گلبرگہ، 7 اکتوبر: گلبرگہ ضلع کے چنچولی میں ایک خاتون کو مبینہ طور پر اس کے شوہر نے گلا گھونٹ کر قتل کردیا اور واردات کو خودکشی کا رنگ دینے کی کوشش کی۔ مقتولہ کی شناخت 30 سالہ پریانکا ہڈپد کے طور پر کی گئی ہے، جبکہ پولیس نے اس کے شوہر سوریہ کانت ہڈپد کو حراست میں لے لیا ہے۔

موصولہ اطلاعات کے مطابق سوریہ کانت، جو پیشے سے وکیل ہے، مبینہ طور پر اولاد نہ ہونے اور میکے سے رقم لانے کے معاملے پر اپنی بیوی کو ہراساں کرتا تھا۔ الزام ہے کہ اسی معاملے پر جھگڑے کے دوران اس نے پریانکا کا گلا گھونٹ دیا، جس کے نتیجے میں اس کی موت ہوگئی۔

واردات کے بعد قتل کو خودکشی ظاہر کرنے کی کوشش کیے جانے کا بھی الزام ہے۔ واقعے کی اطلاع ملنے کے بعد پولیس نے موقع پر پہنچ کر معائنہ کیا اور شواہد جمع کیے۔ چنچولی پولیس اسٹیشن میں معاملہ درج کرلیا گیا ہے اور پولیس نے سوریہ کانت کو اپنی تحویل میں لے کر مزید تفتیش شروع کردی ہے۔