نئی دہلی،12/نومبر(ایس او نیوز/آئی این ایس انڈیا) راجیہ سبھا کے چیئرمین ایم وینکیا نائیڈو نے 18 نومبر سے شروع ہو رہے پارلیمنٹ کے سرمائی اجلاس کو کامیاب بنانے سمیت دیگر اہم مسائل پر تبادلہ خیال کرنے کے لئے ایوان بالا میں مختلف جماعتوں کے رہنماؤں کی 17 نومبر کو میٹنگ بلائی ہے۔ راجیہ سبھا سیکرٹریٹ کے ایک سینئر افسر نے منگل کو بتایا کہ ایوان بالا کے 250 ویں سیشن کے آئندہ پیر کو آغاز ہونے سے پہلے اتوار کی شام کو نائیڈو تمام جماعتوں کے رہنماؤں کے ساتھ نائب صدر کی رہائش گاہ پرملاقات کریں گے۔اس سیشن کو تاریخی قرار دیتے ہوئے انہوں نے کہا کہ اجلاس میں سیشن کے دوران 26 نومبر کو پڑنے والے 70 ویں یوم آئین اور مہاتما گاندھی کی 150 ویں یوم پیدائش کے انعقاد پر بھی غور کیا جائے گا۔اس اجلاس کو اہم قرار دیتے ہوئے افسر نے کہا کہ اس میں آئندہ سیشن کو گزشتہ سیشن ہی کی طرح کام کاج کے لحاظ سے کارگر بنانے کی منصوبہ طے کی جائے گی۔قابل ذکر ہے کہ پارلیمنٹ کے 249 ویں سیشن میں دونوں ایوانوں کی میٹنگیں عام طور پر بغیر کسی تعطل کے ختم ہونے کی وجہ سے گزشتہ سیشن کام کاج کے لحاظ سے سب سے زیادہ فائدہ مند رہا تھا۔سرمائی اجلاس 18 نومبر سے 13 دسمبر تک چلے گا۔