ممبئی،  20/مارچ (ایس او نیوز/ایجنسی) لوک سبھا انتخابات کی تاریخوں کا اعلان کر دیا گیا ہے لیکن کئی میٹنگوں کے باوجود مہاراشٹر میں تین پارٹیوں ( کانگریس ، این سی پی اور شیو سینا ۔ادھو) کے اتحاد سے بنی مہاوکاس اگھاڑی (ایم و ی اے) کی سیٹیوں کا اعلان کیا گیا ہے۔ اسی دوران ونچت بہوجن اگھاڑی (وی بی اے)کے سربراہ ایڈوکیٹ پرکاش امبیڈکر نے منگل کو اعلان کیا ہے کہ ونچت بہوجن اگھاڑی مہاراشٹر میں کانگریس کے حصے میں آنے والی ۷؍پارلیمانی سیٹوں پر بلا شرط پوری حمایت دینے کو تیار ہے۔ اس سلسلے میں ونچت بہوجن اگھاڑی کی جانب سے کانگریس کے صدر ملکارجن کھرگے کو انگریزی میں لیٹر بھی بھیجا گیا ہے۔ 

  اس تعلق سےایڈوکیٹ پرکاش امبیڈکرنے منگل کو آکولہ میں واقع پریس کانفرنس میں بتایاکہ ’’ موجودہ حالات کو دیکھتے ہوئے ہماری پارٹی نے مہاراشٹر میں کانگریس پارٹی کو ۷؍ سیٹوں پر بلا شرط پوری طرح مدد کرنے کیلئے تیارہیں۔ونچت بہوجن اگھاڑی کی جانب سے کانگریس صدر کو لیٹر بھی بھیجا گیا ہے ۔ ہم نے درخواست کی ہے کہ جن سیٹوں پر کانگریس کو ایسا محسوس ہوتا ہے کہ ہماری مدد سے ان کےامیدوار سیٹ جیت سکتے ہیں ایسی ۷؍ سیٹوں کی فہرست وہ ہمیں بھیج دیں ، وہاں ہم ان کی پوری حمایت کریں گے اور مدد کریں گے۔‘‘

   انہوںنے مزید کہا کہ’’ ہمیں امید ہے کہ پرچۂ نامزدگی داخل کرنے سے قبل ہمیں کانگریس کی جانب سے جواب مل جائے گا۔‘‘

 جب پرکاش امبیڈکر سے یہ سوال کیا گیا کہ کیا آپ مہا وکاس اگھاڑی میں شامل نہیں ہے؟ انہوںنے کہا کہ ’’مہاوکاس اگھاڑی سے ہمارا اتحاد ہو رہا ہے یا نہیں اس کی اب تک ہمیں کوئی معلومات نہیں دی گئی ہے۔ ‘‘

 انہوں نے مزید کہا کہ ’’ بی جے پی کو ہرانے  اور اقتدار سے دور کرنے کیلئے جو بھی ضروری اقدامات کرنے ہوں گے ہم کریں گے ۔ امبیڈکر نے یہ بھی کہا کہ مہاوکاس اگھاڑی کے ساتھ اتحاد کیلئےہمارے دروازے آخری دن تک کھلے ہیں اور اس کے بعد ہم فیصلہ لیں گے ۔‘‘

 ایڈوکیٹ پرکاش امبیڈکر نے مزید کہا کہ ’’ہمیں دی گئی اطلاعات کے مطابق مہا وکاس اگھاڑی کی تین پارٹیوں میں اب تک ۱۵؍ سیٹوں پر اتفاق رائے نہیں بنا ہے۔ ۱۰؍ سیٹوں پر شیو سینا اور کانگریس میں ایک رائے نہیں بن سکی ہے اور اسی طرح ۵؍ سیٹوں پر این سی پی اور کانگریس میں اختلاف ابھی باقی ہے۔‘‘

  اس سوا ل پر کہ شیو سینا نے آپ کا ساتھ دینے کا اعلان کیا تھا لیکن آپ نے کانگریس کا ہاتھ مضبوط کرنے کا فیصلہ کیوں کیا؟ اس کے جواب میں پرکاش امبیڈکر نےکہا کہ ’’موجودہ حالات دیکھتے ہوئے ہماری پارٹی میں کانگریس کو حمایت دینے کا فیصلہ ہوا ہے، اس لئےکانگریس کی مدد کرنے کا فیصلہ کیا گیا ،این سی پی اور شیو سینا کے بارے میں ہم لوگوں نے اب تک کوئی فیصلہ نہیںلیا ہے۔ جب فیصلہ لیں گے تب میڈیا کو بتایا جائے گا۔ کانگریس پارٹی کو مدد کرنے کیلئے بھی ہم نے کوئی شرائط نہیں رکھی ہے۔ ‘‘

 انہوں نےمزید کہا کہ سیاست میں نہ اچھے دن ہوتے ہیں اور نہ ہی برے دن۔ سارے دن ایک جیسے ہیں۔ سیاست میں  طورپر مثبت ہونا ضروری ہے۔ تو ہم مثبت ہیں۔ ہم نے کسی کو نہیں چھوڑا اور کسی سے خیانت نہیں کی اور نہ ہم نے کسی سے غداری کی ہے۔ ‘‘واضح رہے کہ حالانکہ گزشتہ دنوں ممبئی کے شیواجی پارک میںبھارت جوڑو نیا یاترا کی اختتامی تقریب/انڈیا اتحاد کی میٹنگ میں  ایڈوکیٹ پرکاش امبیڈکر کو بھی مدعو کیا گیا تھا اور انہوں نے خطاب بھی کیا تھا۔

 ایڈوکیٹ پرکاش امبیڈکرنے مزید کہا کہ’’اگھاڑی کی جانب سے ہمیں ۳؍ سیٹیں دینے کی پیشکش کی گئی تھی جسے ہم نے مسترد کر دیا ہے۔

 مہاوکاس اگھاڑی میں آپسی تنازعہ ہے۔ ان کے درمیان سیٹوں کی تقسیم پر اختلاف ہے اس کیلئے ونچت بہوجن اگھاڑی کو بدنام کرنا درست نہیں۔