نئی دہلی،23؍جون (ایس او نیوز؍ایجنسی)  ملک بھر میں 21 جون کو ریکارڈ تعداد میں ٹیکے لگائے جانے کے حکومت کے دعووں کی پول کھلنے لگی ہے۔ کانگریس کے سینئر لیڈر پی چدمبرم نے کہا ہے کہ ریکارڈ قائم کرنے کے لئے حکومت کی جانب سے ٹیکوں کی جمع خوری کی گئی۔ اس کے ساتھ ہی انہوں نے طنز کرتے ہوئے کہا کہ ’ہو سکتا ہے کہ میڈیسن کا نوبل انعام مودی حکومت کو دیا جائے!‘

پی چدمبرم نے دعوی کیا کہ اتوار کو ٹیکوں کی جمع خوری کی گئی اور پیر کے روز ٹیکہ کاری کا عالمی ریکارڈ قائم کیا گیا، لیکن اگلے دن یعنی کہ منگل کے روز پھر سے پرانی صورت حال رہی۔ انہوں نے طنز کرتے ہوئے کہا کہ انہیں یقین ہے کہ اس کرتب کو گنیز بک آف ریکارڈس میں مقام حاصل ہوگا!

سابق وزیر خزانہ پی چدمبرم نے ٹوئٹ کیا کہ ’’اتوار میں جمع خوری، پیر کو ٹیکہ لگائیں اور منگل کو لنگڑا کر واپس لوٹ جائیں۔ ’ایک دن‘ میں عالمی ’ریکارڈ‘ کے پیچھے یہی راز ہے۔ مجھے یقین ہے کہ اس ’کرتب‘ کو گنیز بک آف ریکارڈس میں جگہ ملے گی۔ انہوں نے مزید لکھا، ’’کون جانے، ہو سکتا ہے میڈیسن کا نوبل انعام مودی حکومت کو فراہم کیا جائے۔ ’مودی ہے تو ممکن ہے‘ کو اب ’مودی ہے، چمتکار ہے‘ پڑھنا چاہیے۔‘‘

خیال رہے کہ مرکزی وزارت صحت نے منگل کے روز دعویٰ کیا تھا کہ ہندوستان نے 21 جون کو ایک دن میں کورونا وائرس کے 88.09 لاکھ ٹیکے لگانے کی ’تاریخی کامیابی‘ حاصل کی ہے اور ان میں سے 64 فیصد خوراکیں دیہی علاقوں میں دی گئی ہیں۔