اڈپی،17 / جولائی (ایس او نیوز) سوشیل میڈیا پر ایک ویڈیو کلپ وائرل ہو رہی ہے جس میں ٹیپّر ڈرائیور اپنی گاڑی کے نیچے پھنسی ہوئی کار کو گھسیٹ کر لے جاتے ہوئے دیکھا جا سکتا ہے۔ 
    
بتایا جاتا ہے کہ یہ حادثہ اس وقت پیش آیا جب ایک سینٹرو کار ساگر سے مینگلورو آ رہی تھی اور ٹیپّر گاڑی بیلمان سے بیکمپاڈی کی طرف جا رہی تھی ۔ اس دوران سینٹرو کار  ٹیپّر کے پچھلے حصہ سے ٹکرا کر اسی کے ڈمپر کے اندر پھنس گئی ۔ مگر اس بات سے لاعلم ٹیپّر ڈرائیور نے حادثہ سے گھبرا کر اپنی گاڑی کی رفتار تیز کر دی  اور تقریباً ایک کلو میٹر تک گھسیٹتا ہوا لے گیا۔
    
مقامی لوگوں نے گاڑی کا پیچھا کرکے ٹیپّر ڈرائیور کو گاڑی روکنے پر مجبور کر دیا ۔ اسی کے ساتھ پڈوبیدری پولیس ٹیم نے موقع پر پہنچ کر ٹیپّر کو اپنے قبضے میں لیا اور کار میں پھنسے زخمی دو مرد اور ایک خاتون   کو علاج کے لئے قریبی اسپتال میں منتقل کرنے کا انتظام کیا۔