بھٹکل 4 / جون (ایس او نیوز) بینک میں سونا پرکھنے والے کے ساتھ ساز باز کرتے ہوئے نقلی سونا گروی رکھ کر86 لاکھ روپئے سے بھی زائد رقم اڑانے کے دو الگ الگ معاملے پیش آئے ہیں جن کے تعلق سے ٹاون  پولیس تھانہ میں شکایت درج کی گئی ہے.

پولس نے بتایا کہ ایکسیس بینک کے بھٹکل شاخ کے منیجر نے ٹاون پولیس اسٹیشن میں جو شکایت درج کروائی ہے اس کے مطابق پہلا معاملہ یکم مارچ 2023 سے 30 مارچ کے دوران پیش آیا ہے جس میں نقلی سونا گروی رکھ کر 58,92,400 روپئے قرضہ لیا گیا ہے ۔ اس معاملے میں بینک میں سونا پرکھنے والے اودیا ایس رائیکر اسارکیری کے علاوہ بھٹکل مین روڈ کی رہنے والی سونندا پانڈو رنگا نائک، کمٹہ کی سلوچنا وگھنیشور نائک ، ساگر ناگولّی کی ہیما وتی اومیش نائک، سرسی کی سریتا رتناکر بھنڈاری، موڈ بھٹکل کے کیشو ناگپا نائک، بھٹکل جالی کے پرکاش رامچندرا اچاری اور چوتھنی کودرے بیرپا روڈ کے رہنے والے منجوناتھ نارائن نائک کو ملزم بتایا گیا ہے ۔ 

نقلی سونا گروی رکھ کر قرضہ لیتے ہوئے فراڈ کرنے کا دوسرا معاملہ 6  فروری 2023 سے 20 فروری کے دوران انجام دیا گیا ہے ۔ اس میں نقلی سونے کے عوض 27,54,900 روپئے  کا چونا لگایا گیا ہے۔ اس معاملے بھی بینک میں سونے کی جانچ کرنے والے اودیا ایس رائیکر اسارکیری کو ملزم بتایا گیا ہے اور دیگر ملزمین کی شناخت جالی کوڈی کے رہنے والے ناگراج کرشنا نائک، چوتھنی کے منجو ناتھ نارائن نائک، بھٹکل مین روڈ کی رہنے والی سونندا پانڈو رنگا نائک کے طور پر کی گئی ہے۔ اس طرح نقلی سونا رکھ کر بینک لون کے نام پر 8647300  روپئے حاصل کئے گئے ہیں۔ 

بینک منیجر کی شکایت پر کارروائی کرتے ہوئے ٹاون پولیس تھانہ میں کیس درج کر لیا گیا ہے۔ پولس جانچ کررہی ہے۔