نئی دہلی،16/دسمبر (ایس او نیوز/ ایجنسی) شہریت ترمیمی قانون کے خلاف دارالحکومت دہلی کے جامعہ نگرعلاقے میں احتجاج اور پولیس سے جھڑپ کے بعد جامعہ ملیہ اسلامیہ کوپولیس  نے چھاؤنی میں تبدیل کر دیا ہے۔ بتایا جاتا ہےکہ پولیس  نے اس دوران مظاہرین کی گرفتاریاں بھی کی ہیں اورانہیں پولیس بس سے لے جایا گیا ہے۔  طلباء کا الزام ہےکہ پولیس نے جامعہ کےاندرگھس کرطلبا وطالبات کی پٹائی بھی کی ہے۔ اس طرح کے ویڈیو بھی وائرل ہورہے ہیں۔

یہ بھی بتایا جا رہا ہےکہ پولیس نے جامعہ ملیہ اسلامیہ کی جامع مسجد میں آنسو گیس کے گولے بھی داغ دیے ، جس کے بعد مسجد کے امام صاحب نے لاؤڈ اسپیکرکے ذریعہ پولیس سے بڑی اپیل کرتے ہوئےکہا کہ برائے مہربانی آنسوگیس کےگولے نہ داغیں؛ کیونکہ آس پاس میں چھوٹے چھوٹے بچے اور عورتیں بھی ہیں۔  اس دوران پولیس نے بڑی تعداد میں مظاہرین کو حراست میں بھی لے لیا ہے۔

اس سے قبل جامعہ ملیہ اسلامیہ کے طلباء کے ساتھ جامعہ نگرکے مقامی لوگوں نے بھی اس احتجاج میں شرکت کرکےشہریت ترمیمی قانون کی مخالفت کرتے ہوئے احتجاج کیا۔ احتجاجی مظاہرے میں آج جامعہ نگرکےلوگوں نے بھی بڑھ چڑھ کر حصہ لیا کیونکہ آج اوکھلا بند کا اعلان کیا گیا تھا۔ بتایا جاتا ہےکہ جامعہ ملیہ اسلامیہ کے طلباء اورمقامی لوگوں نے جامعہ ملیہ اسلامیہ کے پاس احتجاج کیا۔ وہیں مقامی لوگوں نے متھرا روڈ کوجام کردیا، جبکہ مظاہرین نے سریتا وہار انڈرپاس، کالندی کنج روڈ بھی جام کیا، جس سے ٹریفک نظام بری طرح سے متاثرہوا، مظاہرین کا کہنا ہے کہ بس کو پولیس نے خود آگ لگاکر پر امن احتجاج کو پر تشدد بنایا ہے، بس کو آگ لگانے میں طلباء اور مقامی افراد کا ہاتھ نہیں ہے

اس دوران پولیس نے مظاہرین کوہٹانےکےلئےآنسوگیس کےگولے کا استعمال کیا  اوراحتیاط کے طورپرآس پاس کی سڑکیں بند کردی گئی ہیں۔ اس احتجاج میں اوکھلا کے رکن اسمبلی امانت اللہ خان کے ساتھ دیگرمقامی لیڈروں نے بھی شرکت کی۔ طلباء اورمقامی لوگوں کا احتجاجی مارچ آس پاس کےعلاقوں سےہوکرگزرا۔ احتجاجی مظاہرہ میں ذاکرنگر، بٹلہ ہاؤس، شاہین باغ وغیرہ کے لوگوں نےاپنی دوکانیں بند کرکے شرکت کی۔ اس پورے علاقے میں زبردست پولیس فورس کو تعینات کیا گیا ہے۔

واضح رہے کہ جامعہ ملیہ اسلامیہ کے طلباء نے جمعہ کوبھی پرامن احتجاجی مظاہرہ کیا تھا، اس وقت بھی پولیس اورطلباء میں جھڑپ ہوئی تھی۔ اس میں بڑی تعداد میں طلباء زخمی ہوئے تھے۔ آج احتجاج کا تیسرا دن ہے، جس میں مقامی لوگوں نے بھی بڑھ چڑھ کر حصہ لیا ہے۔ قابل ذکرہےکہ جامعہ ملیہ اسلامیہ میں تمام امتحانات ملتوی ہوگئے ہیں اورجامعہ انتظامیہ کی طرف سے 16 دسمبرسے 5 جنوری تک موسم سرما کی تعطیلات کا اعلان کردیا گیا ہے.