کمٹہ ، 9 / اپریل (ایس او نیوز) بچوں کو عید کے لئے کپڑے خریدنے کے بعد  واپس گھر لوٹنے کے دوران  پیش آئے ایک سڑک حادثہ میں باپ اور بیٹی فوت ہوگئے، جبکہ ایک اور بچی زخمی ہے۔ حادثہ کمٹہ کے مرجان نیشنل ہائی وے 66 پر  پیر کو پیش آیا۔

ذرائع سے ملی اطلاع کے مطابق کمٹہ کے  برگی گرام کا رہنے والا اسحاق شیخ   اپنی دو بچیوں 12 سالہ   ثنا شیخ  اور13سالہ سمرن  شیخ  کے ساتھ اسکوٹر پر سوار ہو کر  عید کی خریداری کرکے اپنے گھر لوٹ رہا تھا جس کے  دوران اسکوٹر بے قابو ہو کر سڑک کے بیچ میں موجود ڈیوائڈر سے ٹکرا گیا۔ ٹکر لگتے ہی  اسکوٹر سمیت تینوں سڑک کے بیچوں بیچ گرگئے اور شدید زخمی ہوگئے۔ موقع پر موجود لوگوں نے فوری طور پر زخمیوں کو کمٹہ تعلقہ اسپتال میں منتقل کیا ۔جہاں   ثناء نامی بچی نے اسپتال پہنچنے سے قبل ہی راستے میں دم توڑ دیا ، جبکہ باپ اسحاق شیخ (40)  جسے  شدید زخمی حالت میں مینگلور منتقل کیا گیا تھا، پیر کی رات کو انتقال کرگیا۔ دوسری بچی سمرن کا ہاتھ فریکچر ہوا ہے جسے  کمٹہ سرکاری اسپتال  کے بعد پرائیویٹ اسپتال منتقل کیا گیا ہے۔
    
کمٹہ پولیس تھانہ میں  اس معاملے میں کیس درج کیا گیا ہے ۔

Father and daughter killed in road accident in Kumta returning from Eid shopping