بینگلورو میں ٹماٹروں کی لوٹ! شادی شدہ جوڑا گرفتار، دیگر ملزمان کی تلاش
بینگلورو،22/جولائی (ایس او نیوز/ایجنسی) ملک بھر میں ٹماٹر کی بے تحاشہ قیمتوں کے درمیان بینگلورو میں ٹماٹروں کی لوٹ کا معاملہ سامنے آیا ہے۔ پولیس نے واردات میں ملوث میاں بیوی کو گرفتار کر لیا ہے، جبکہ دیگر ملزمان کی تلاش جاری ہے۔ رپورٹ کے مطابق لوٹ کی یہ واردات 8 جولائی کو انجام دی گئی تھی اور بینگلورو کے آر ایم سی یارڈ پولیس اسٹیشن میں ایف آئی آر درج کی گئی تھی۔ پولیس نے ہفتہ کو یہ اطلاع دی۔
پولیس کے مطابق گرفتار جوڑے کی شناخت بھاسکر اور اس کی بیوی سندھوجا کے نام سے ہوئی ہے۔ اس معاملے میں راکی، کمار اور مہیش کی تلاش جاری ہے۔ بینگلورو میں 8 جولائی کو ایک کسان کو دھمکی دے کر بدمعاشوں نے 2000 کلو ٹماٹر لے جانے والی گاڑی لوٹ لی تھی۔
یہ واقعہ بینگلورو کے چیکاجالا کے قریب آر ایم سی یارڈ پولیس اسٹیشن کی حدود میں پیش آیا۔ کسان چتردرگا ضلع کے ہیریور قصبے سے کولار مارکیٹ میں ٹماٹر لے کر جا رہا تھا۔ ٹماٹر دیکھنے کے بعد بدمعاشوں کے گروہ نے کار کا پیچھا کیا۔ انہوں نے گاڑی روکی اور کسان اور بولیرو کارگو گاڑی کے ڈرائیور پر حملہ کیا اور الزام لگایا کہ ان کی گاڑی کو ٹکر ماری گئی ہے۔ انہوں نے رقم کا مطالبہ کیا اور بعد میں رقم منتقل کرا لی۔ وہ کسان کے ساتھ کارگو گاڑی میں سوار تھے۔ بعد میں بدمعاشوں نے کسان کو زبردستی کار سے دھکیل دیا اور ٹماٹروں سے بھری گاڑی لے کر فرار ہو گئے۔
آر ایم سی یارڈ پولیس نے سی سی ٹی وی فوٹیج اکٹھا کر کے سراغ اکٹھے کئے۔ ملزم جوڑا گاڑی کو چنئی لے گیا اور وہاں ٹماٹر فروخت کیے۔ انہوں نے گاڑی پینیا اور بینگلورو کے قریب کھڑی کی اور دوسری گاڑی میں فرار ہو گئے، جس پر رجسٹریشن نمبر پلیٹ نہیں تھی۔ خیال رہے کہ کرناٹک میں ٹماٹر کی قیمت 120 سے 150 روپے تک پہنچ گئی ہے اور کسانوں کو اپنے ٹماٹر کی فصل کی حفاظت کرنی پڑ رہی ہے۔