منافرت پر مبنی جرائم کی روک تھام کے لئے غیر سرکاری ادارے نے کیا ٹول فری ہیلپ لائن نمبر کا اجراء
نئی دہلی 15/جولائی (ایس او نیوز) ملک میں منافرت پر مبنی جرائم کی روک تھام کے لئے معزز اور نامور شہریوں کے غیر سرکاری ادارے ’United Against Hate‘ نے ٹول فری ہیلپ لائن نمبر جاری کیا ہے جس پر کال کرکے ایسے جرائم کی اطلاع دی جاسکتی ہے۔
فی الحال اس نمبر00-600-3133-1800 پر ملک کے100شہروں میں ادارے کی طرف سے خدمات فراہم کی جائیں گی۔بتایاگیا ہے کہ ماب لنچنگ اور اس قسم کے بڑھتے ہوئے جرائم کو دیکھتے ہوئے اس ہیلپ لائن کا اجراء کیا گیا ہے، تاکہ منافرت والی ذہنیت کے خلاف مہم چلائی جاسکے اور ملک میں امن و امان کا ماحول برقرار رکھی جاسکے۔
منافرت پر مبنی جرم ہونے کی صورت میں یا اس کے امکانات پیدا ہونے پر اس نمبر پر کال کرکے اطلاع دی جاسکتی ہے۔ ادارے کی طرف سے پولیس کی مدد فراہم کرنے اورمتاثرہ افراد کو ایف آئی آر درج کروانے میں تعاون کیا جائے گا۔
نفرت کے خلاف متحد اس ادارے کی طرف سے ہیلپ لائن کو لانچ کرنے کی تقریب میں سپریم کورٹ کے سینئر وکیل سنجے ہیگڈے،سینئر صحافی اُورملیش،گورکھپور میڈیکل کالج میں دماغی بخارسے بچوں کی موت کے بعد معطل کیے گئے ڈاکٹر کفیل خان، دہلی یونیورسٹی کے پروفیسر اپورواننداکے علاوہ اور کئی نامور شخصیات شریک تھیں۔
اس موقع پر پروفیسر اپوروانندا نے کہا کہ ”اب وقت آگیا ہے کہ جس طرح کئی یوروپین ممالک میں ہورہا ہے اسی طرح جان بوجھ کر کیے جانے والے منافرت بھرے جرائم کا جائزہ لیا جائے۔ اس ہیلپ لائن کو جاری کرنے کی ضرورت اس لئے پیش آئی ہے کیونکہ اقلیتوں پرمحض ان کی شناخت کی وجہ سے حملے ہورہے ہیں۔ پولیس منافرت بھرے جرائم کو سنجیدگی سے نہیں لے رہی ہے۔“
بتایاگیا ہے کہ اس ہیلپ لائن پر ہندی اور انگریزی زبان میں دستیاب رہیں گی۔اس ادارے کے رضاکار کال موصول ہونے کی صورت میں متاثرہ افراد یا اطلاع فراہم کرنے والوں کو ضروری قانونی رہنمائی اور مدد فراہم کریں گے۔