کمٹہ میں سورج نائک سونی، ہلیال میں گھوٹنیکر کا ساتھ ملنے سے بھاری ہو سکتا ہے بی جے پی امیدوار کا پلڑا
کاروار، 7 / اپریل (ایس او نیوز) اتر کنڑا کے سیاسی پنڈتوں کا خیال ہے کہ سابق ایم ایل سی اور جنتا دل ایس لیڈر ایس ایل گھوٹنیکر کے بیٹے سرینواس گھوٹنیکر کی بی جے پی میں شمولیت اور کمٹہ میں جنتا دل ایس لیڈر سورج نائک سونی کی حمایت کی وجہ سے اس مرتبہ پارلیمانی الیکشن میں بی جے پی امیدوار وشویشورا ہیگڑے کاگیری کا پلڑا کچھ بھاری ہوگیا ہے ۔
بعض حلقوں سے خبریں مل رہی تھیں کہ ہلیال کے با اثر لیڈر ایس ایل گھوٹنیکر ہی خود بی جے پی میں شامل ہونے والے ہیں، مگر کہا جاتا ہے کہ کچھ تیکنیکی دشواریوں کی وجہ سے انہوں نے اپنے بیٹے کو آگے کر دیا اور اسے بی جے پی میں شامل کرواتے ہوئے بی جے پی کو اپنی حمایت کا سگنل دے دیا ۔ ویسے بھی جنتا دل ایس نے بی جے پی کے ساتھ مل کر الیکشن لڑنے کا جو فیصلہ کیا ہے اس کی وجہ سے گھوٹنیکر کی حمایت مشترکہ امیدوار کی حیثیت سے بی جے پی کے وشویشورا کاگیر کو ہی ملنی تھی ۔
دوسری طرف کمٹہ میں جنتا دل ایس لیڈر سورج نائک سونی کے تعلق سے یہ بات عام ہوگئی تھی کہ وہ کانگریس میں شامل ہو رہے ہیں اور اس سے کانگریسی امیدوار ڈاکٹر انجلی نمبالکر کو فائدہ ہونے کی توقع کی جا رہی تھی ۔ مگر سورج نائک نے اپنے کٹر مخالف دینکر شیٹی کے ساتھ مل کر مشترکہ امیدوار وشویشورا ہیگڑے کاگیری کے لئے تشہیری مہم چلانے کا جو فیصلہ کیا ہے اس سے سمجھا جا رہا ہے کہ یہ اقدام بھی وشویشورا کاگیری کے لئے بڑا فائدہ مند ہوگا ، کیونکہ سورج نائک کے پاس اپنے حامیوں کی بڑی قوت موجود ہے اور اب وہ لوگ بی جے پی امیدوار کے حق میں ووٹ ڈالیں گے ۔
اس کے علاوہ 2018 الیکشن کے موقع پر جب سورج نائک سونی بی جے پی سے نکل کر جنتا دل میں شمولیت اختیار کی تھی تو اس وقت دینکر شیٹی نے سورج نائک کے حامیوں کی ایک بڑی تعداد کو بی جے پی کی طرف راغب کر لیا تھا ۔ یہ گروپ بھی بی جے پی امیدوار کے لئے ہی کام کرے گا ۔ دوسری طرف گزشتہ اسمبلی الیکشن میں سورج نائک سونی سے جنتا دل امیدوار کی حیثیت سے جس کثیر تعداد میں ووٹ حاصل کیے تھے وہ سب ووٹ بھی موجودہ این ڈی اے امیدوار وشویشورا کاگیری کے حق میں جا سکتے ہیں ۔
کچھ یہی حال ہلیال میں گھوٹنیکر فیمیلی کا ہے ۔ مراہٹا باشندوں پر ان کا اچھا خاصہ اثر ہے ۔ حالانکہ کانگریس کی امیدوار ڈاکٹر انجلی خود مراہٹا بیلٹ سے تعلق رکھتی ہیں ، اس کے باوجود گھوٹنیکر کی وجہ سے مراہٹا ووٹ بینک میں شگاف پڑنے کے قوی آثار موجود ہیں ۔
اس صورتحال کے پس منظر میں کہا جا سکتا ہے کہ گھوٹنیکر اور سورج نائک سونی اور ان کے حامیوں کی وجہ سے کانگریسی امیدوار کے لئے جیت کا راستہ مزید سخت ہوگیا ہے اور وشویشورا ہیگڑے کاگیری کی راہ کچھ آسان ہوگئی ہے ۔
