بہت پھیکی نظر آ رہی ہے عید ، سڑکوں پر نہ نمازیوں کی بھیڑ نہ محلوں میں رونقیں
نئی دہلی،25؍مئی(ایس او نیوز؍ایجنسی) دنیا کے بیشتر حصوں میں کل عید الفطر کاتہوار منایا گیا تھا لیکن ہندوستان سمیت دنیا کے کئی حصوں میں آج عید منائی جا رہی ہے۔ کورونا وائرس کی وجہ سے نافذ لاک ڈاؤن نے عید کے دن کی تمام رونقیں پھیکی کر دی ہیں۔ ہندوستان میں لاک ڈاؤن کی وجہ سے لوگوں نے عید گاہ اور مساجد میں نمازوں کا اہتمام نہیں کیا لیکن گھروں میں یا تو عید کی یا پھر چاشت کی نماز ادا کیں۔
ویسے تو رمضان کے پورے مہینے میں لوگ اپنے گھروں میں ہی رہے اور انتہائی حالات میں ہی گھر سےباہر گئے لیکن سب کو امید تھی کہ عیدسے پہلے اس وبا سے کچھ راحت مل جائےگی اور سماجی دوری کے کچھ ضوابط کے ساتھ عوام عید کی نماز ادا کر پائیں گے لیکن ایسا ممکن نہیں ہوا اور اس وقت ملک میں کورونا متاثرین کی تعداد میں بہت تیزی سےاضافہ دیکھنے کو مل رہا ہے۔
غرباء اور مدارس اس موقع پر سب سے زیادہ متاثر ہوئے ہیں کیونکہ ہر مسلمان عید کی نماز سے پہلے فطرے کی رقم ادا کرتا تھا اور ایک بڑی تعداد نماز کوجاتےہوئے مدارس کی یا تو پرچیاں کٹوا لیا کرتے تھے یا پھر راستے میں بیٹھےغربا کودے دیا کرتے تھے۔ اس مرتبہ فطرہ اور امداد لوگوں نے بہت منظم طریقہ سے دی ہے۔
ملک کے بیشتر حصوں میں نرمی ہے اور دن میں لوگ ایک دوسرے کے گھر جا کر عید کی مبارکباد دے سکتے ہیں لیکن لوگ اس وبا کی وجہ سے خود احتیاط برت رہے ہیں۔ عید کی مبارکباد فون پر ہی دے رہے ہیں۔ اب دیکھنا یہ ہے کہ شام تک کیا حالات رہتے ہیں۔لیکن یہ عید ایسی عید ہے جس میں نہ تو اجتماعی نماز کا ہی ثواب ہے اور نہ ہی سماجی رونقوں کے مزے۔
