بیلتنگڈی 13 / فروری (ایس او نیوز) ایک پرائیویٹ اسکول میں زیر تعلیم ایس ایس ایل سی کی طالبہ نے زہر خورانی کے ذریعے خود کشی کر لی جس کے بعد اس انتہائی اقدام کا سبب بننے والے دو ٹیچروں کو دھرمستھلا پولیس نے گرفتار کر لیا۔

بتایا جاتا ہے کہ تریشا (16 سال) نامی طالبہ نے 7 فروری کو زہر کھایا تھا جس کے بعد اسے انتہائی نازک حالت میں پہلے منگلورو کےہاسپٹل میں اور پھر بعد میں بہتر علاج کے لئے بنگلورو کے وکٹوریہ ہاسپٹل میں منتقل کیا گیا تھا ۔ مگر علاج کارگر نہ ہونے سے اس نے کل اسپتال میں ہی دم توڑ دیا۔

اس معاملے میں دھرمستھلا پولیس نے طالبہ کے اسکول میں ڈرائنگ ٹیچر اور پی ای ٹیچر کی خدمات انجام دینے والے روپیش اور سدانندا کو گرفتار کرلیا ہے۔ ایسا سمجھا جاتا ہے کہ ان ٹیچروں کے مسئلے پر ہی لڑکی نے خود کشی جیسا اقدام کیا ہے۔ ڈرائنگ ٹیچر روپیش کے بارے میں یہ بھی معلوم ہوا ہے کہ اس نے تریشا کے بارے میں ایک ہتک آمیز میسیج اسکول کے دوسرے طالب علم کو بھیجا تھا، جس کا پتہ چلنے کے بعد تریشا ذہنی طور پر بہت پریشان ہوگئی تھی ۔

دھرمستھلا پولیس اس معاملے کی تحقیقات کر رہی ہے۔