چینائی 20/فروری (ایس او نیوز/ایجنسی) ضلع تریپور کے اویناشی میں  بس اور کنٹینر ٹرک کے درمیان ہوئی بھیانک ٹکر میں 20 لوگوں کی موت واقع ہوگئی جبکہ 24 لوگ شدید زخمی ہوگئے۔ حادثہ جمعرات کی اولین ساعتوں میں  اس وقت پیش آیا جب تیز رفتار کنٹرینر ٹرک کا ایک پہیہ پھٹ گیا جس کے نتیجے میں ٹرک بے قابو ہوکر تیز رفتاری کے ساتھ  کیرالہ کی سرکاری والوو بس سے ٹکراگیا۔ مرنے والوں میں چھ خواتین بھی شامل ہیں۔جبکہ  بس ڈرائیور اور کنڈکٹر دونوں بھی حادثے میں فوت ہوگئے ہیں۔

ذرائع سے ملی اطلاع کے مطابق  بس بنگلورو سے تمل ناڈو ہوتے ہوئے ریاست کیرالہ کے کوچی جارہی تھی ، جمعرات صبح تمل ناڈو کے اویناشی۔ سیلم بائی پاس پر صبح قریب 3:25 کو  حادثے کا شکار ہوگئی۔ بتایا گیا ہے کہ بس بنگلور کے شانتی نگر بس اسٹینڈ سے بدھ کی شام 8:15 بجے کوچی کے لئے نکلی تھی۔

اخبار نویسوں سے گفتگو کرتے ہوئے تریپور کے ڈسٹرکٹ کلکٹر وجئے کارتیکیئن  نے بتایا کہ تباہ شدہ بس سے  تمام بیس لاشیں نکالی جاچکی ہیں اور  تریپور سرکاری اسپتال کے  مردہ خانے میں منتقل کی گئی ہیں۔ انہوں نے بتایا کہ حادثے میں زخمی ہونے والوں میں بعض کی حالت نازک بنی ہوئی ہے، مگر ہم اُنہیں بہتر ٹریٹمنٹ دے کر بچانے کی ہرممکن کوشش کررہے ہیں۔

ٹکر میں بس کے ایک حصہ کے چیتھڑے اُڑ گئے ہیں جس کی فوٹو سوشیل میڈیا پر وائرل ہورہی ہے۔  بتایا گیا ہے کہ بس پر 48 مسافر سوار تھے اور جس وقت یہ حادثہ ہوا، سبھی مسافر گہری نیند میں تھے۔

کیرالہ کے ٹرانسپورٹ وزیر اے کے سسیندرن نے بتایا کہ  بس پر 48 مسافر سوار تھے جس میں سے 42 کیرالہ کے تھے جو ایرناکولم، پالکاڈ اور تھریسور جارہے تھے، حادثے کی اطلاع ملتے ہی موصوف جائے وقوع کے لئے روانہ ہوگئے۔

بعض مرنے والوں کی شناخت بس ڈرائیور گیریس ، روسلے، ایگنی رفائل، کرن کمار، حنیش، سیوکمار، راجیش کے، نصیف  محمدعلی،  روشانا جوہن،ایشوریا،  جسمن شاجو اور  بائیجو کی حیثیت سے کی گئی ہے، کئی ایک کی شناخت  ہنوز ہونی باقی ہے۔