سرسی :2مارچ؍   (ایس اؤ نیوز )سرکل پولس انسپکٹر ششی کانت ورما پر الزام ہے کہ انہوں نے پولس تھانہ کے اہلکار   رائٹر جگدیش کی بے عزتی کی اُس  کے ساتھ گالی گلوچ کیا ، جس کے بعد کہا جارہا ہے کہ اسی بات سے پریشان رائٹر جگدیش نے آئی جی اور ضلع کے اعلیٰ پولس افسران کو خط لکھ کر خودکشی کی اجازت دینے کی بات کہی اور پھر لاپتہ ہوگیا۔

میڈیا رپورٹوں کے مطابق سرسی سی پی آئی ششی کانت ورما  نے جمعہ کو بنواسی پولس تھانہ کا دورہ کیاتھا۔ گرچہ انہیں صبح 9بجے تھانہ پہنچنا تھا لیکن وہ ایک گھنٹہ دیری سے بنواسی پولس تھانہ پہنچے تھے۔ اُس وقت  بنواسی پولس تھانہ کاایک پی ایس آئی چھٹی پر   تھا جبکہ دوسرا  پی ایس آئی تھانہ میں ہی  موجود تھا۔  رپورٹ کے مطابق جب سی پی آئی ، بنواسی پولس تھانہ پہنچے تو انہیں گارڈ آف آنر دینےکے دوران ٹھیک طرح سےکمانڈ نہ دئیے جانےکی بات کرتے ہوئے  سی پی آئی نے بنواسی پولس تھانہ عملہ کے ساتھ  گالی گلوچ  کی۔

بنواسی  پولس تھانہ میں  رائٹر جگدیش نامی  ایک پولس اہلکار بھی  ہے۔ بتایا گیا ہے کہ سی پی آئی نے  اس کے ساتھ  بھی گارڈ آف آنر ٹھیک طرح سے نہ  دینے  پر بے تحاشہ گالی گلوچ  کی اور اُس کی بے عزتی کی۔ کہا جارہا ہے کہ واقعہ سے پریشان رائٹر جگدیش نے پولس ڈی آئی جی اور ضلع پولس اعلیٰ افسران کو مخاطب کرتےہوئے خط کے ذریعے بنواسی پولس تھانہ میں  ہوئے واقعے کی  تحریر کے ذریعے جانکاری دی ۔ پتہ چلا ہے کہ  خط میں سی پی آئی کی گالی گلوچ کا بھی  تذکرہ کیا ہے اور پھر   رائٹر جگدیش  نے اپنے خط میں  خود کشی کی اجازت  دینے کی مانگ  کی ، اُس کے بعد سے وہ لاپتہ ہوگیا ہے۔کمٹہ سمیت مختلف جگہوں پر  رائٹر جگدیش کی تلاش جاری ہے ۔ اس سلسلےمیں وضاحت کے لئے ضلع کے  اعلیٰ پولس افسران  سے موبائیل پر  رابطہ کرنےکی کوشش کی گئی لیکن کوئی بات نہیں ہوپائی ۔