آج سے سکینڈ پی یو سی کے امتحانات کا ہواآغاز؛ بھٹکل میں چار امتحانی مراکز؛ پہلے دن 19 طلبہ غیر حاضر
بھٹکل یکم مارچ (ایس او نیوز) آج جمعہ سے پوری ریاست کرناٹک میں سکینڈ پی یو سی کے امتحانات کا آغاز ہوگیا۔ بھٹکل میں چار مراکز میں منعقدہ امتحانات میں آج پہلے دن کنڑا اور عربی کا پیپر تھا اور اس کے لئے 1028 طلبہ کو پرچہ لکھنا تھا ، 19 طلبہ غیر حاضر رہے۔
ضلع اُترکنڑا میں آج پہلے دن 9672 طلبہ کو اپنا پہلا پرچہ لکھنا تھا ، 9472 حاضررہے ، اس طرح پورے ضلع میں جملہ 200 طلبہ پہلے دن کے امتحان میں شریک نہیں ہوسکے۔
ذرائع سے ملی اطلاع کے مطابق بھٹکل میں انجمن پی یو کالج سینٹر میں پہلے دن 237 طلبہ میں 236 حاضر رہے، ایک کی غیر حاضری ریکارڈ کی گئی۔ جنتاودیالیہ پی یو سی کالج شرالی میں310 میں 306 طلبہ حاضررہے۔ نیوانگلش پی یو کالج میں297 میں 288 حاضر رہے، جبکہ آر این شٹی مرڈیشور کالج میں 184 میں 179 حاضر رہے۔ اس طرح بھٹکل کے چار مراکز میں جملہ 1028 میں طلبہ میں سے 1009 طلبہ نے اپنا پہلا پرچہ لکھا۔
یاد رہے کہ امتحانی مراکز کے 200 میٹر حدود تک دفعہ 144 کے تحت امتناعی احکامات نافذ کئے گئے ہیں، اس حدود میں کسی بھی زیراکس دکان کو کھولنے کی اجازت نہیں ہے۔ تمام امتحانی مراکز میں سی سی ٹی وی کیمرے نصب کئے گئے ہیں ۔ اور طلبہ کے ساتھ ساتھ امتحانی مرکز سے متعلقہ افسران اور اہلکاروں وغیرہ کوبھی ا سمارٹ واچ اور موبائل فون سمیت کسی بھی قسم کی الیکٹرانک اشیاء اپنے ساتھ امتحان گاہ میں نہ لے جانے کی اجازت نہیں تھی۔ اسی طرح ڈپٹی کمشنر کی ہدایت پر تمام مراکز پر ہیلتھ اہلکاران کو بھی تعینات کیا گیا ہے۔