نئی دہلی،27؍اکتوبر(ایس او نیوز؍ایجنسی) دہلی کے نائب وزیر اعلی منیش سسودیا نے کہا ہے کہ دہلی میں سبھی کلاسوں کے لیے یکم نومبر سے اسکولوں کو کھولا جائے گا اور چھٹ پوجا کے انعقاد کی اجازت بھی دے دی گئی ہے منیش سسودیا نے ڈی ڈی ایم اے کی میٹنگ میں دہلی کے پرائیوٹ اور سرکاری اسکولوں کو تمام کلاسوں کے لئے یکم نومبر سے کچھ شرائط کے ساتھ کھولنے کا فیصلہ لیا گیا ہے۔

منیش سسودیا نے کہا کہ اسکولوں کو آن لائن تعلیم کے انتظامات کو بھی یقینی بنانا ہوگا۔ کوئی بھی اسکول بچوں کو زبردستی آنے پر مجبور نہیں کر سکتا۔ اسکول اس بات کو بھی یقینی بنائیں گے کہ کلاس میں طلباء کی تعداد 50 فیصد سے زیادہ نہ ہو۔ انہوں نے کہا کہ کورونا وائرس یہاں کنٹرول میں ہے، اس لیے اسکولوں کو کھولنے کے ساتھ ساتھ کورونا رہنما خطوط پر عمل کرتے ہوئے چھٹ پوجا کی بھی اجازت دی جائے گی۔

منیش سسودیا نے کہا کہ پہلے سے طے شدہ مقامات پر کورونا ضابطوں پر عمل کر تے ہوئے چھٹ منائی جائے گی۔ محدود تعداد میں لوگوں کو شرکت کی اجازت دی جائے گی۔ انہوں نے عوام سے اپیل کی ہے کہ چھٹ ایک بہت اہم تہوار ہے، اسے بہت اچھی طرح اور احتیاط سے منائیں۔