ٹکٹ نہ ملنے پر بدھوڑی کا درد چھلک پڑا، ٹکٹ کے باوجود پون سنگھ کا الیکشن لڑنے سے انکار
نئی دہلی، 4/مارچ (ایس او نیوز/ایجنسی) بی جے پی نے اپنے امیدواروں کی فہرست جاری کردی ہے جس سے کچھ جگہ خوشی کا ماحول ہے تو کہیں افسوس ظاہر کیا جارہا ہے۔ پارٹی نے مغربی بنگال کے آسنسول سے بھوجپوری فلم اداکار پون سنگھ کو بھی ٹکٹ دیا تھا لیکن اس اعلان کے محض ایک دن بعد ہی پون سنگھ نے الیکشن لڑنے سے انکار کر دیا ہے۔ اس سیٹ سے ترنمول کانگریس لیڈر اور فلم اسٹار شتروگھن سنہا رکن پارلیمنٹ ہیں اور اب بی جے پی کو ان کے خلاف کوئی دوسرا امیدوار میدان میں اتارنا ہوگا۔ پون سنگھ نےٹویٹ کیا کہ آسنسول سےامیدوار بنانے کیلئے بی جے پی کی قومی قیادت کے تمام اہم لیڈران کا شکریہ لیکن میں کسی وجہ سے آسنسول سے الیکشن نہیں لڑپاؤں گا۔ اس میں انہوں نے بی جے پی صدر جے پی نڈا کو ٹیگ کیا ہے۔
ادھر ٹکٹ نہ ملنے سے بھی سخت ناراضگی ہے لیکن مسکرا کر پارٹی اعلیٰ کمان کے فیصلے پر راضی ہونے کی بات کہی جارہی ہے۔ ایسے ہی لوگوں میں رمیش بدھوڑی بھی شامل ہیں جن کے لئے ٹکٹ کا اعلان نہیں ہوا ہے۔ انہوں نے اس تعلق سے کہا کہ ’’کئی بار باہر سے آئے مہمانوں کے لئے نئی چادر بچھائی جاتی ہے جبکہ گھر کے لوگ پرانی چادر پر ہی سوتے ہیں۔ ‘‘ واضح رہے کہ یہ وہی رمیش بدھوڑی ہیں جنہوں نے پارلیمنٹ میں کنور دانش علی کے خلاف انتہائی شدید قسم کی بدزبانی کی تھی جس کی وجہ سے پارٹی کو رسوائی کا سامنا کرنا پڑا تھا۔