بھٹکل: عیدالفطر کے پیش نظر عید گاہ کے اطراف فوری صفائی مہم شروع کرنے تنظیم نے میونسپالٹی کو دیا میمورنڈم
بھٹکل7/ اپریل (ایس ااو نیوز) قومی سماجی ادارہ مجلس اصلاح و تنطیم بھٹکل کی طرف سے بھٹکل میونسپل چیف آٓفسر کو میمورنڈم پیش کرتے ہوئے درخواست کی گئی ہے کہ عید الفطرکے پیش نظرعید گاہ کے اطراف پورے علاقہ میں فوری طور پر صفائی مہم شروع کی جائے اور عید گاہ کے ساتھ ساتھ بھٹکل کے اہم ناکوں میں بھی صفائی کو یقینی بنایا جائے۔
تنظیم جنرل سکریٹری عبدالرقیب ایم جے ندوی کی قیادت میں تنظیم وفد نے میونسپل چیف آفسرشیوانند آلور سے ملاقات کرتے ہوئے بتایا کہ عید الفطر کے لئے دو یا تین دن باقی ہیں، اور عیدگاہ کے اطراف غیر قانونی باکڑوں کی وجہ سے عیدگاہ کا تقدس پامال ہورہا ہے۔ غیر مجاز اسٹالز عیدگاہ کی دیواروں سے لگے ہوئے ہیں اور ان اسٹالز کے لوگ عیدگاہ کی دیواروں کی طرف ہی دکانوں کی آڑ میں رفع حاجت بھی کرتے ہیں۔اس کے ساتھ ہی اسٹالز سے لگے ہوئے نالوں میں کچروں کا ڈھیر جمع ہے ۔ وفد نے زور دیا کہ فوری طور پر عید گاہ کے اطراف پورے علاقہ کی صفائی کی جائے اور کچرہ پھیکنے والوں اورگندگی پھیلانے والے غیر قانونی باکڑا والوں کے خلاف قانونی کاروائی بھی کی جائے۔ وفد نے پورے بھٹکل شہر میں عیدالفطر کی تیاریوں کے سلسلے میں ہنگامی صفائی کے اقدامات کو نافذ کرنے کی بھی درخواست کی بالخصوص عید کے دن جن جن علاقوں سے جلوس جامع مسجد سے عیدگاہ کی طرف جائے گا، اُن تمام علاقوں اور راستوں کو صاف کرنے کے لئے فوری اقدامات کرنے کا مطالبہ کیا۔
تنظیم وفد نے کہا کہ جلد ہی شہر میں مانسون کی آمد بھی متوقع ہے، لیکن شہر میں ابھی تک نالوں کی صفائی نہیں کی گئی ہے جس کی وجہ سے نالوں میں کچروں کی بھرمار دیکھی گئی ہے۔ وفد نے کہا کہ اگر بارش کے پانی کی نکاسی کے لئے نالوں کی صفائی کی طرف فوری توجہ نہیں دی گئی تو بارش کا پانی کئی دکانوں کے اندر گھسنے کا خدشہ ہے اورشہر تالاب میں تبدیل ہونے کے آٓٓثار نظر آرہے ہیں۔ وفد نے تمام نالوں کی صفائی کرنے اور سیوریج کی فوری مرمت کا کام شروع کرنے کا بھی مطالبہ کیا۔
وفد میں جیلانی شاہ بندری، کلاگر محمد حُسین معلم، کے ایم اشفاق و دیگر موجود تھے۔