بینگلورو، 20/ جولائی (ایس او  نیوز ) ریاستی وزیراعلی سدارامیا نے گروہا لکشمی اسکیم کا باضابطہ آغاز کیا ۔ کانگریس حکومت کی 5 گیارنٹی اسکیموں میں یہ ایک ہے ۔ ودھان سودھا کے ضیافتی ہال میں منعقدہ اس تقریب میں نائب وزیر اعلی ڈی کے شیو کمار، وزیر بہبود و خواتین واطفال لکشمی ہبالکر حاضر ر ہے۔ رکن اسمبلی حلقہ شیواجی نگر رضوان ارشد نے اس تقریب کی صدارت کی۔

اس اسکیم کے لئے اہل خواتین  19 جولائی  سے آن لائن عرضیاں داخل کر سکتی ہیں ۔ اس اسکیم کی اہل خواتین جنہوں نے عرضیاں داخل کی ہوں انہیں 15  اور 20  اگست کے بعد ماہانہ 2 ہزار رو پئے ملنے لگیں گے۔ اس اسکیم کے لئے رجسٹریشن ایک سال تک جاری رہے گا ۔ ایک ٹوئٹ میں کانگریس پارٹی نے یہ کہا ہے ۔ ٹوئٹ میں یہ کہا گیا ہے کہ اس اسکیم سے کرناٹک میں 1.10 کروڑ خواتین کو فائدہ ہوگا۔ حکومت نے اس اسکیم کے لئے 18 ہزار کروڑ روپے مختص کئے ہیں ۔

کانگریس لیڈر رندیپ سنگھ سرجے والا نے بتایا کہ گرو ہا لکشمی اسکیم ہندوستان کی سب سے بڑی اسکیم ہے جس کے تحت خواتین کے بینک کھاتوں میں رقم راست منتقل کی جارہی ہے ۔ یہ اسکیم بڑھتی ہوئی قیمتوں سے نمٹنے میں مدد کرے گی۔ بی پی ایل ، اے پی ایل اور انتیو دیا کارڈوں میں نام درج رہنے والی اپنے کنبہ کی سربراہ خواتین اس اسکیم کی اہل ہیں۔ جو خواتین انکم ٹیکس ادا کر رہی ہیں اور جن کے شو ہر انکم ٹیکس ادا کر رہے ہیں اس اسکیم کے اہل نہیں ہیں ۔ جو خواتین اس اسکیم سے استفادہ کرنا چاہتی ہیں وہ گرام ون، کرنا ٹکا  ون اور بنگلور دون مراکز میں عرضیاں داخل کریں۔ اس کے لئے آدھار کارڈ اور بی پی ایل، اے پی ایل اور انیتو دیا کارڈس داخل کرنا ضروری ہے۔