چیف الیکشن کمشنر اور الیکشن کمشنرز کی تقرری سے متعلق بل کو صدر کی ملی منظوری، نوٹیفکیشن جاری
نئی دہلی، 30/دسمبر (ایس او نیوز/ایجنسی) چیف الیکشن کمشنر اور دیگر الیکشن کمشنرز (تقرری، سروس کی شرائط اور دفتر کی مدت کار) بل 2023 کو صدر دروپدی مرمو نے منظوری دے دی ہے۔ جمعہ کو ایک سرکاری نوٹیفکیشن اس سلسلے میں جاری کیا گیا ہے۔ چیف الیکشن کمشنر اور دیگر الیکشن کمشنرز (تقرری، سروس کی شرائط اور دفتر کی مدت کار) بل 2023 میں چیف الیکشن کمشنر اور دیگر الیکشن کمشنرز کی تقرری کے لیے صدر جمہوریہ کو سفارشات کرنے کے لیے وزیر اعظم، اپوزیشن لیڈر اور ایک مرکزی وزیر کی صدارت میں ایک سلیکشن کمیٹی کا بھی التزام ہے۔
آج پبلی کیشن انڈسٹری کو کنٹرول کرنے والے برطانوی دور کے قانون میں تبدیلی اور رسالوں کے رجسٹریشن کے طریقہ کار کو آسان کرنے کے لیے پریس و رسالہ رجسٹریشن بل 2023 کو بھی صدر جمہوریہ کے ذریعہ منظوری دے دی گئی ہے۔ یہ بل 1867 کے پریس اور کتاب رجسٹریشن ایکٹ کی جگہ لیتا ہے۔ راجیہ سبھا میں 3 اگست کو یہ بل پاس کیا گیا تھا۔
21 دسمبر کو لوک سبھا میں بل پر بحث کے دوران مرکزی وزیر انوراگ ٹھاکر نے کہا تھا کہ یہ بل آسان اور اسمارٹ ہے۔ اس سے اخبارات و رسائل کے رجسٹریشن کے لیے آسان راستہ ہموار ہوگا۔ پہلے اخبارات یا رسائل کو آٹھ مراحل کے رجسٹریشن کا عمل سے گزرنا پڑتا تھا۔ یہ اب ایک بٹن کے کلک پر کیا جا سکتا ہے۔ انھوں نے کہا کہ اخبارات و رسائل اب دو ماہ کے اندر رجسٹرڈ ہو سکیں گے، جبکہ پہلے اس کے لیے دو سے تین سال کا وقت لگتا تھا۔
اس درمیان سرمائی اجلاس کے اختتام کے بعد جمعہ کو صدر جمہوریہ دروپدی مرمو نے پارلیمنٹ کے دونوں ایوانوں کا پروروگیشن کر دیا۔ اس سلسلے میں لوک سبھا و راجیہ سبھا سکریٹریٹ کے ذریعہ ایک بلیٹن جاری کیا گیا ہے۔
