جے ڈی یو لیڈرپرشانت کشورنے نتیش کمارکو مشکل میں ڈال دیا ، کانگریس اجلاس میں شہریت قانون اور این آرسی کے بائیکاٹ کے فیصلہ کا خیرمقدم کیا
پٹنہ،13/جنوری(ایس او نیوز/آئی این ایس انڈیا)جے ڈی یو کے لیڈر پرشانت کشور نے کانگریس ورکنگ کمیٹی کے اجلاس میں شہریت قانون اور این آرسی کے بائیکاٹ کے فیصلے کا خیر مقدم کیا ہے-انہوں نے اس کے لیے راہل اور پرینکا گاندھی کا خصوصی شکریہ ادا کیا اور ساتھ ہی ایک بار پھر یقین دہانی کرائی کہ بہار میں این پی آر نافذنہیں ہو گا-پرشانت کشور نے یہ بات ٹویٹر پر لکھی ہے-لیکن ان کی یہ بات اتنی عام نہیں ہے-دراصل نائب وزیر اعلیٰ اور بی جے پی کے سینئر لیڈر سشیل مودی نے کہا تھا کہ اس کا نوٹیفکیشن جاری ہو گیاہے-لیکن پرشانت کشور کا کہنا ہے کہ نتیش کمار نے این آرسی نہیں نافذکرنے کا اعلان کر دیا ہے اور این پی آر، این آرسی کا پہلا قدم ہے تواسے نافذ نہیں کیا جائے گا-لیکن جنتا دل یونائٹیڈ کے رہنماؤں کا کہنا ہے کہ پرشانت کے اس ٹویٹ نے نتیش کمار کی مشکلیں بھی بڑھا دی ہیں کیونکہ اگر وہ این پی آر نافذنہیں کرتے ہیں تو بی جے پی ناراض ہو جائے گی اور نافذکریں گے تو کرسی کے لئے ایک قدم آگے چل کر دو قدم پیچھے جانے کی ان کی حکمت عملی اجاگر ہوگی اور ان پر پہلے ہی یوٹرن کے الزامات لگ رہے ہیں -فی الحال اب دیکھنا یہ ہوگا کہ نتیش کمار کا فیصلہ کیا ہوتا ہے-کیونکہ پارٹی کے دو اور سینئر لیڈر للن سنگھ اور آر سی پی سنگھ نے کئی بار کہا ہے کہ شہریت، این پی آراور این آرسی پر افواہ پھیلانے کی کوشش ہے-فی الحال ابھی سب کی نظریں راجگیر میں ہونے والی جے ڈی یو کے میٹنگ پر ٹکی ہیں -لیکن اتنا تو طے ہے کہ جیسے جیسے بہار میں اسمبلی انتخابات قریب آ رہے ہیں، شہریت قانون، این پی آر اور این آرسی کا مسئلہ معاملات کو دلچسپ رہا ہے -