کانگریس نے الیکٹورل بونڈ اسکیم کو ’پردھان منتری ہفتہ وصولی یوجنا‘ کا نام دیا
نئی دہلی، 19/ مارچ (ایس او نیوز /ایجنسی) الیکٹورل بونڈ معاملے میں حکومت پر حملہ تیز کرتے ہوئے پیر کو کانگریس نے اسے پوری اسکیم کو ’’پردھان منتری ہفتہ وصولی یوجنا‘‘ کا نام دیا۔ کانگریس کے جنرل سیکریٹری اور میڈیا شعبے کے انچارج جے رام رمیش نے دعویٰ کیا کہ ۲۱؍ ایسی کمپنیاں جن کو سی بی آئی، ای ڈی اور انکم ٹیکس محکمہ کی جانچ کا سامنا ہے، نے الیکٹورل بوند کے توسط سے چندہ دیاہے۔ انہوں الیکٹورل بونڈ اسکیم کو گھوٹالہ قراردیتے ہوئے نشاندہی کی کہ ہر گزرتے دن کے ساتھ اس گھوٹالے کے نئے نئے شواہد سامنے آرہے ہیں۔
جے رام رمیش نے پیر کو ایک طویل ایکس پوسٹ میںالیکٹورل بونڈ کے تحت چندہ دو دھندہ لو، ہفتہ وصولی اور ٹھیکہ لو رشوت دو، فرضی کمپنی کے ذیلی عنوان کے تحت ایسے معاملات کی تفصیل پیش کی ہے جن سے یہ ظاہر ہوتا ہے کہ کمپنیوں کو یاتو جانچ ایجنسیوں سے ڈرا کر الیکٹورل بونڈ خریدنے پر مجبور کیاگیا یا پھر سرکاری ٹھیکوں کے بدلے میں ان سے چندہ لیاگیاہے۔انہوں نے اس ضمن میں کئی مثالیں پیش کیں اور بتایاکہ ۱۰؍ نومبر ۲۰۲۲ء کو ای ڈی نے اروبندو فارماکے پی سارتھ چندر ریڈی کو منی لانڈرنگ کے معاملے میں گرفتار کیا،۱۵؍ نومبر کواروبندو فارما نے ۵؍ کروڑ کے الیکٹورل بونڈ خریدے۔ انہوں نے مزید بتایا کہ ’’اکتوبر ۲۰۱۸ء میں انکم ٹیکس کے چھاپہ کا سامنا کرنے کے ۶؍ ماہ بعد اپریل ۲۰۱۹ء میں نویُگ انجینئرنگ کمپنی نے ۳۰؍ کروڑ کے بونڈ خریدے۔ ‘‘
اسی طرح انہوں نے رونگٹا سنس پرائیویٹ لمیٹڈپرانکم ٹیکس کے چھاپوں کے بعد ۵۰؍ کروڑ کے بونڈ کی خریداری، شرڈی سائی الیکٹریکلس پر چھاپے کے بعد ۴۰؍ کروڑ کے بونڈ کی خریداری اور ڈاکٹر ریڈیز کی لیب پر ای ڈی کے چھاپے کے بعد ۳۱؍ کروڑ، ۲۱؍ کروڑ اور پھر ۱۰؍ کروڑ کے الیکٹورل بونڈ کی خریداری کا حوالہ دیا۔
کانگریس کے جنرل سیکریٹری نے الیکٹورل بانڈ پر لگاتار دوسرے دن حکومت کو گھیرتے ہوئے کہا کہ ’’یہ چند مثالیں ہیں، ۲۱؍ کمپنیاں جو سی بی آئی، ای ڈی اور انکم ٹیکس کی جانچ کا سامنا کررہی ہیں نے الیکٹورل بونڈ خریدے ہیں۔‘‘ انہوں نے حکومت پر ’’ٹھیکہ لو، رشوت دو‘‘ کا الزام عائد کرنے کے ساتھ ہی ساتھ شیل کمپنیوں (فرضی کمپنیوں) سے چندہ لینے کا بھی الزام عائد کیا۔ انہوں نے کہا کہ ای ڈی اور محکمہ انکم ٹیکس، جس نے وزیر اعظم کی ہفتہ وصولی اسکیم کو چلانے والے ای ڈی اور محکمہ انکم ٹیکس نیز الیکٹورل بانڈ گھوٹالے کو انجام دینے والا بھارتیہ اسٹیٹ بینک وزیر خزانہ کو رپورٹ کرتے ہیں۔