اُڈپی  13 / اپریل (ایس او نیوز) نیشنل ہائی وے پر خطرناک انداز میں بائک ڈرائیونگ کرنے والے ایک نوجوان نے خود اپنے ہی خلاف پولیس کے پاس شکایت درج کروائی جس کے بعدبرہماور  پولیس نے اسے گرفتار کر لیا ۔

    بتایا جاتا ہے کہ  سوشیل میڈیا پر ایک ویڈیو کلپ وائرل ہوئی تھی جس میں تنوش بیکاڈی نامی ایک بائک سوار نے اپنے بائک کا اسٹینڈ نیچے دبا کر سڑک پر رگڑتے ہوئے نیشنل ہائی وے پر گاڑی چلائی جس کی وجہ سے تیز چنگاریاں بکھرنے لگیں ۔ یہ ایک خوفزدہ کرنے والا منظر تھا ۔ 

    یہ واقعہ برہماور تعلقہ میں نیشنل ہائی وے پر مدر پیالیس کے قریب پیش آیا تھا ۔ سوشیل میڈیا پر اس طرح کے اسٹنٹ کے خلاف رائے سامنے آنے لگی اور اسے عوام کو خوفزدہ کرنے والی خطرناک حرکت قرار دیا جانے لگا تو تنوش نے خود ہی اپنے خلاف شکایت درج کروائی اور پولیس نے اس پر کارروائی کرتے ہوئے تنوش کو گرفتار کر لیا ۔