اتر پردیش کی عوام نے مودی کو ہٹانے کی پوری تیاری کر لی ہے: مایاوتی
لکھنؤ،21؍اپریل (ایس او نیوز؍آئی این ایس انڈیا) بہوجن سماج پارٹی (بی ایس پی) صدر مایاوتی نے وزیر اعظم نریندر مودی پر حملہ کرتے ہوئے کہا کہ انہیں وزیر اعظم بنانے والی اتر پردیش کے عوام نے اب انہیں اس عہدے سے ہٹانے کی پوری تیاری کر لی ہے۔مایاوتی نے یہاں ایک بیان میں کہا کہ وزیر اعظم اتر پردیش میں گھوم گھوم کر یہ کہہ رہے ہیں کہ اس پردیش نے ہی انہیں ملک کا وزیر اعظم بنایا ہے، جو سو فیصد درست ہے لیکن عوام ان سے یہ بھی پوچھ رہی ہے کہ اس عہدے پر پہنچنے کے بعد انہوں نے صوبے کی 22 کروڑ عوام کے ساتھ وعدہ خلافی اور دھوکے بازی کیوں کی؟انہوں نے کہا کہ بی جے پی خاص طور پر مودی کو عوام کی یہ بات سمجھنی چاہئے کہ اگر وہ انہیں وزیر اعظم بنا سکتی ہے تو انہیں اس عہدے سے ہٹا بھی سکتی ہے، جس کی پوری تیاری اس لوک سبھا انتخابات میں دکھائی دے رہی ہے۔مایاوتی نے کہا کہ مودی نے سیاسی اور انتخابی مفاد کے لئے اپنی ذات کو پسماندہ قرار دیا، لیکن بی ایس پی۔ایس پی۔آر ایل ڈی نے ریاست کی 22 کروڑ عوام کے دل کی بات کوسنا، سمجھا اور اس کا مکمل احترام کرکے مفاد عامہ اور ملک کے مفاد کے پیش نظر آپس میں اتحادکیا۔