لکھنؤ،22جنوری(ایس او نیوز/آئی این ایس انڈیا) شہریت قانون کی مخالفت میں ملک میں جس طرح احتجاج اور مظاہروں میں اضافہ ہورہا ہے، اس کے نتیجے میں ایک طرف مرکزی حکومت بوکھلا چکی ہے وہیں  اُدھر اُترپردیش میں  وزیراعلیٰ  یوگی ادتیہ ناتھ کی  مظاہروں کو روکنے کی تمام  اُلٹی سیدھی کوششیں  ناکام ہوتی جارہی ہیں،  بی جے پی لیڈران کی سمجھ میں نہیں آرہا ہے کہ وہ  ان مظاہروں پر کس طرح قابو پائیں، یہی وجہ ہے کہ ان کی زبانوں سے غلط اور نازیبا تبصرے ادا ہورہے ہیں۔

اسی طرح کی بوکھلاہٹ یو پی کے وزیراعلیٰ ادتیہ ناتھ کی اُس وقت سامنے آئی جب  دہلی کے شاہین باغ اور لکھنؤ کے گھنٹہ گھرپر شہریت ترمیم قانون کے خلاف خواتین کے مظاہرے پر انہوں نے کہا کہ کچھ لوگوں میں اتنی ہمت نہیں کہ وہ خود تحریک کریں، لہذا گھر کی عورتوں اور بچوں کو چوراہوں پر بیٹھا دیا ہے۔  سی ایم  ادتیہ ناتھ  نے کہا کہ مرد گھر میں لحاف میں سو رہے ہیں اور خواتین چوراہے پر ہیں۔

حالانکہ ہر کوئی جانتا ہے کہ ملک بھر میں جو مظاہرے اور احتجاج ہورہے ہیں وہ بالکل پُرامن طور پر ہورہے ہیں ،اس کے باوجود ادتیہ ناتھ نے کانپور میں سی اے اے کی حمایت میں منعقدہ  ریلی سے خطاب کرتے ہوئے  کہا کہ مظاہرے کے نام پر تشدد کو برداشت نہیں کیا جائے گا۔

ایک طرف وہ خود کہہ رہے ہیں کہ خواتین احتجاج کررہی ہیں، دوسری طرف انہوں نے اپنی پرانی باتوں کو دہراتے ہوئے کہا کہ اپوزیشن ملک کے دشمنوں کی زبان بول رہا ہے،تشدد کرنے والوں سے وصولی کی جائے گی۔اپوزیشن کے رویہ سے ملک کے دشمنوں کے حوصلے بلند ہو گئے ہیں،ہندوستان کو بدنام کرنے کی مہم چل رہی ہے۔ پریشانی کے عالم میں مبتلا ادتیہ ناتھ  نے کہا کہ کانگریس، بائیں بازو کی پارٹیاں  اور این جی او لوگوں  کو  بھڑکا رہے ہیں،ہمیں خاموش نہیں رہنا ہے۔کانگریس لیڈر کہہ چکے ہیں کہ جب تک آئی ایس آئی کے ایجنٹوں کی ہندوستان میں انٹری نہیں کرا لیتے اس وقت تک نہیں مانیں گے۔

واضح رہے  کہ سی اے اے کے خلاف گزشتہ کئی دنوں سے دہلی کے شاہین باغ اور لکھنؤ کے گھنٹہ گھر پر مظاہرہ چل رہا ہے۔لکھنؤ کے گھنٹہ گھرعلاقے میں خواتین اور بچے ہاتھوں میں ترنگا تھامے شہریت ترمیمی ایکٹ کے خلاف مظاہرہ کر رہے ہیں۔ پرامن مظاہرہ کرنے کے باوجود احتجاج میں شریک  اردو کے مشہور شاعر منور رانا کی بیٹیوں سمیت 159 کے خلاف  ایف آئی آر درج کی گئی  ہے۔