کاروار ٹیگور بیچ پر سمندری کٹاو روکنے والے پتھر ہٹانے کا معاملہ : افسران نے کیا لاعلمی کا اظہار
کاروار، 9 / اپریل (ایس او نیوز) شہر کے ٹیگور بیچ پر سمندری کٹاو کو روکنے کے لئے گزشتہ پانچ سال سے جو بولڈرس ڈالے گئے تھے ، انہیں وہاں سے ہٹا کر ماجالی کے علاقے میں منتقل کیا جا رہا ہے اور تعجب خیز بات یہ ہے کہ متعلقہ محکمہ جات کے افسران اس بات سے لاعلم ہیں کہ کس کی ہدایت پر یہ رکاوٹی دیوار کے پتھر ہٹائے جا رہے ہیں ۔
معلوم ہوا ہے کہ انفرا اسٹرکچر ڈیولپمنٹ پورٹس اینڈ ان لینڈ ٹرانسپورٹ ڈپارٹمنٹ کی جانب سے رکاوٹی دیوار کے پتھروں کو منتقل کرنے کا کام کیا جا رہا ہے ۔ لیکن ایک سینئر افسر نے بتایا کہ "مقامی ماہی گیروں اور سیاسی لیڈر آنند اسنوٹیکر کی طرف سے ٹیگور بیچ کے اس مقام پر رکاوٹی پتھروں کو بچھانے کی مخالفت ہو رہی تھی ۔ لیکن ان پتھروں کو کس نے اور کس لئے یہاں سے منتقل کیا اس بارے میں مجھے کوئی خبر نہیں ہے ۔ اس معاملے کے بارے میں ہمیں جانکاری حاصل کرنی ہوگی ۔"
جب بندرگاہ کے ڈائریکٹر کیپٹن سوامی سے پوچھا گیا تو انہوں نے کہا :"بولڈرس کی منتقلی پر سچ مچ مجھے تعجب ہو رہا ہے ۔ مجھے اس کا علم نہیں ہے کہ کس کی ہدایت پر وہ لوگ ایسا کر رہے ہیں ۔ میں اپنے انجینئر سے اس کے تعلق معلومات حاصل کروں گا ۔"