سڑک حادثات میں کمی نہ ہونے پر مرکزی وزیر نتن گڈکری نے کہا، یہ میرے محکمہ کی سب سے بڑی ناکامی، میں تسلیم کرتا ہوں
نئی دہلی،15/جولائی (ایس اونیوز/ آئی این ایس انڈیا) روڈ ٹرانسپورٹ اور ہائی وے وزیر نتن گڈکری نے پیر کو اعتراف کیا کہ ملک میں گزشتہ پانچ سال میں سڑک حادثات میں کمی کرنے میں ان کے محکمہ کو کامیابی نہیں ملی ہے اور انہوں نے امید ظاہر کی کہ موٹر یان ترمیم بل منظور ہونے کے بعد سڑک حادثوں سے لوگوں کی جان بچانے میں مدد ملے گی۔گڈکری نے لوک سبھا میں ’موٹر یان (ترمیم) بل 2019‘ بل کو پیش کرتے ہوئے یہ بات کہی۔انہوں نے کہا کہ بل گزشتہ لوک سبھا میں منظور کیا گیا تھا لیکن راجیہ سبھا میں منظور نہیں ہو سکا تھا۔ گڈکری کے مطابق انہوں نے راجستھان کے اس وقت کے وزیر ٹرانسپورٹ کی صدارت میں کمیٹی قائم کرکے اس معاملے کا جائزہ لیا جس میں 18 ریاستوں کے وزیر ٹرانسپورٹ شامل رہے۔وزیر نے کہا کہ بل مستقل کمیٹی اور مشترکہ پرور کمیٹی دونوں میں گیا۔انہوں نے کہا کہ حکومت نے گزشتہ پانچ سال میں بہت کوشش کی لیکن بل کو منظور نہیں کرا سکے۔گڈکری نے کہا کہ اس میں سیاست نہیں ہونی چاہئے اور حکومت بات چیت کرنے کو تیار ہے۔سڑک حادثوں سے لوگوں کی جان بچانے کے لئے بل کو پارلیمنٹ کی مہر لگوانا ضروری ہے۔سڑک حادثوں کے تناظر میں فکر مندی کا اظہار کرتے ہوئے سڑک وزیر ٹرانسپورٹ نے کہا کہ گزشتہ پانچ سال میں ملک میں سڑک حادثوں میں صرف 3.5 سے 4 فیصد کی کمی آئی ہے۔انہوں نے کہاکہ یہ میرے محکمہ کی سب سے بڑی ناکامی ہے میں اسے قبول کرتا ہوں۔انہوں نے کہا کہ تمل ناڈو نے سڑک حادثات میں 15 فیصد تک کمی لانے میں کامیابی حاصل کی ہے اور ہم وہاں قانون کو پورے ملک میں اپنانے کے بارے میں غور کریں گے۔انہوں نے کہا کہ ہم ریاستوں کے حقوق اس بل کے ذریعے نہیں لے رہے ہیں۔اس سے پہلے ترنمول کانگریس کے سوگت رائے نے بل پیش کئے جانے کی مخالفت کرتے ہوئے کہا کہ یہ ریاستوں کے حقوق کی خلاف ورزی کرتا ہے۔یہ دیہی علاقوں میں سڑک کی تعمیر کے ریاستوں کے حقوق کو لیتا ہے۔کانگریس کے ادھیر رنجن چودھری نے کہا کہ بل پیش کرنے سے پہلے ریاستی حکومتوں کو اعتماد میں لیا جانا چاہئے تھا۔گڈکری نے یہ بھی کہا کہ ملک میں فرضی ڈرائیونگ لائسنس کی کثرت ہے اور ہندوستان میں ڈرائیونگ لائسنس بنوانا سب سے آسان ہے۔لوگوں کے ذہن میں جرمانہ بھرنے وغیرہ کو لے کر کوئی ڈر نہیں ہے۔لہٰذا مذکورہ بل منظور ہونا ضروری ہے۔بل کے مقاصد اور وجوہات میں کہا گیا ہے کہ سڑک حادثات میں اضافہ، ٹریفک کے قواعد و ضوابط وغیرہ کے وجوہات کے پیش نظر وزارت میں مختلف فریقین سے شکایات اور تجاویز حاصل ہوئے۔ایسے میں سڑک کی حفاظت اور نقل و حمل کے نظام کو بہتر بنانے کے لیے آٹوموٹو ایکٹ 1988 میں فوری طور پر ترمیم کی ضرورت محسوس ہوئی تاکہ ٹرانسپورٹ کے شعبے میں سیکورٹی اور کارکردگی کے مسائل کو حل کیا جا سکے۔مجوزہ ترمیم بل 2019 سڑک کی حفاظت، شہریوں کی سہولت، پبلک ٹرانسپورٹ کو مضبوط بنانے اور مسائل کو حل کرنے کے لیے ہے۔
