برہماور میں نمّ ناڈ۔ اوکوٹا کا اہم اجلاس؛ اُڈپی کمیٹی نے سنبھالی ذمہ داری؛ اُترکنڑا میں کمیٹی قائم کرنے عنایت اللہ شاہ بندری کو دی گئی ذمہ داری
برہماور ،30؍ اگست (ایس او نیوز) مسلمانوں کو سرکاری نوکری دلانے اور مسلم نوجوانوں کو آئی اے ایس، آئی پی ایس سمیت دیگر مقابلہ جاتی امتحانات میں شریک ہونے کی ترغیب دینے اور اُنہیں اہم سرکاری عہدوں کو حاصل کرنے کے لئے آگے بڑھانے کے مقصد سے ساحلی کرناٹک کے مینگلور اور اُڈپی میں نمّ ناڈ۔اوکوٹا کے نام سے کمیٹیاں قائم کی گئی ہیں، ایک اور ساحلی ضلع اُترکنڑا میں بھی اسی طرح کی ایک کمیٹی قائم کرنے بھٹکل کے معروف سماجی کارکن اور جےڈی ایس صدر عنایت اللہ شاہ بندری کو ذمہ داری سونپی گئی ہے۔ اس تعلق سے اتوار کو اُڈپی کے برہماور میں واقع مدر پیالیس آڈیٹوریم میں نمّ ناڈ۔اوکوٹا کا اہم اجلاس منعقد کیا گیا جس میں ضلع اُڈپی کمیٹی تشکیل دی گئی اور ضلعی صدر نے اپنا عہدہ سنبھالتے ہوئے اُڈپی میں سرگرمیاں شروع کرنے کا تیقن دیا۔
نمّ ناڈ ۔اوکوٹا سینٹرل کمیٹی کے نائب صدر ڈاکٹر رضوان احمد کارکلا کی صدارت میں منعقد ہ اجلاس کا اغاز ضلع اُڈپی کے اوکوٹا کے جنرل سکریٹری مولانا ضمیر احمد رشادی کی تلاوت کلام پاک سے ہوا۔ سینٹرل کمیٹی کے انتظامی سیکریٹری حسین ہائکاڈی نے افتتاحی خطاب کیا اڈپی ضلع نمّ ناڈ۔ اوکوٹا کے صدر مشتاق احمد بیلوے اور یوتھ ونگ صدر جی ریحان تراسی نے اپنے عہدہ کا چارج لیا ۔ ان کے ساتھ 16ضلعی عہدیداران اور 27 ضلع کمیٹی کے اراکین نے بھی اپنے منصب کا چارج لیا ۔
عہدے اور منصب کا چارج لینے والوں نے خطاب کرتے ہوئے حاضرین اور اراکین کو یقین دلایا کہ انہیں جو ذمہ داری سونپی گئی ہے اس کو پورے خلوص کے ساتھ نبھانے اور اوکوٹا کے مقاصد اور اہداف کو پورے کرنے کی بھرپور کوشش کریں گے ۔ انہوں نے اس کام کے لئے اراکین سے تعاون کی درخواست کی ۔
اس موقع پر سرکاری اسکیموں سے متعلق معلومات فراہم کرنے کے لئے منعقدہ کیمپ میں تربیت کار کے فرائض انجام دینے والے عبدالرزاق کاپو اور نوزل احمد ملکی کی خدمات کی ستائش کرتے ہوئے ان کی تہنیت کی گئی ۔ ویڈیو کانفرنس کے ذریعے سینٹرل کمیٹی کے صدر محمد سلیم موڈبیدری اور سابق وزیر یو ٹی قادر نے عہدوں کا چارج لینے والوں کے لئے نیک تمناوں کا اظہار کیا ۔
مہمان خصوصی سابق ایم ایل اے محی الدین باوا، جمیعت الفلاح جنوبی کینرااور اڈپی کے صدرشبیہ احمد قاضی، نمّ ناڈ۔ اوکوٹا شمالی کینرا کے صدر عنایت اللہ شاہ بندری، وقف بورڈ مشاورتی کمیٹی اڈپی کے سابق صدر ناخوا یحییٰ ملپے، اڈپی ضلع نمّ ناڈو۔ اوکوٹا کے نائب صدر محمد ارشاد نیجار نے اپنے تاثرات کا اظہار کیا ۔
شاکر حسین شیشا نے کلمات تشکر پیش کیے ۔ عبدالشکور بیلوے نے نظامت کی اور عبدالصمد خان کارکلا نے پروگرام آرگنائز کیا ۔
عبدالحمید موڈبیدری خازن کے علاوہ ضلع کمیٹی کے اراکین اور تعلقہ کمیٹی کے عہدیداران اسٹیج پر موجود تھے ۔
