عید الاضحیٰ کے پیش نظر ممبئی میں قربانی کے لئے جانوروں کا مناسب انتظام کرنے اور مویشیوں کی رفت میں درپیش مسائل کو دور کرنے کا مطالبہ لے کر مسلم جماعتوں نے کی پریس کانفرنس
ممبئی 29 جولائی (ایس او نیوزِ) ممبئی میں عیدالاضحیٰ کے دوران قربانی کی ادائیگی کے تعلق سےمہاراشٹرا حکومت کے فیصلے میں عملی مشکلات کے سبب عوام کے اندرپائی جانے والی شدید بے چینیوں کو محسوس کرتے ہوئے آج بدھ کو وڈیو کانفرنس زوم کے ذریعے ایک پریس کانفرنس کا انعقاد کیا گیا جس میں مسلمانوں کی مختلف تنظیموں کے ذمہ داران نے شرکت کی اور مسلمانوں کو درپیش مختلف مسائل پیش کرتے ہوئے حکومت سے مطالبہ کیا کہ ان مسائل کو حل کیا جائے ۔
پریس کانفرنس میں بتایا گیا کہ فون یا انٹر نیٹ کے ذریعہ بکروں کی حصولیابی عملاً ممکن نہیں ہے۔ اس لیے حکومت کے لئے ضروری ہے کہ وہ مسلم محلوں میں چھوٹی چھوٹی منڈیوں کا انتظام کرے تاکہ لوگ سوشیل ڈسٹنسنگ کا خیال رکھتے ہوئے بکرے یا مویشیاں خرید سکیں اور انہیں دور سے جانور لانے کی زحمت بھی نہ اُٹھانا پڑے۔ اسی طرح دیونار کے اندر بڑے جانور کی قربانی کا بھی مناسب انتظام کیا جائے تاکہ احتیاط کے ساتھ اس فرض کی ادائیگی میں بھی سہولت ہو۔
بکروں کی رفت کے تعلق سے جانکاری دی گئی کہ بکروں کو لانے میں بظاہر کسی طرح کی پابندی نہیں ہے لیکن انتظامیہ کی سختی کے سبب تاجروں کو دشواریاں پیش آرہی ہیں۔ جانوروں کے ٹرک راستوں میں پھنسے ہوئے ہیں ۔ جس کی وجہ سے خبریں آرہی ہیں کہ کئی تاجروں کی بکرے اور دیگر مویشیاں راستے میں ہی مر گئی ہیں ۔ عید کے لئے بمشکل اب تین دن رہ گئے ہیں اور ایسے میں مویشیوں کے تاجروں کو شہر کے اندر داخل ہونے نہ دینے اور راستوں میں ہی ٹرک پھنس جانے سے ایک طرف مویشیوں کے مالک پریشان ہیں تو وہیں دوسری طرف خریداروں کو بھی قربانی کے لئے بروقت جانور خریدنے میں دشواریاں پیش آرہی ہیں۔
مسلم اداروں کے ذمہ داران نے اس موقع پر پُر زور مطالبہ کیا کہ عید الاضحیٰ کے پیش نظر ضلعی اور ریاستی انتظامیہ بکروں کی ترسیل میں نرمی برتے اور عوام کو عیدالاضحیٰ کے موقع پر جانوروں کی قربانی دینے میں سہولت فراہم کرے ۔
مسلم قائدین نے اس موقع پر مسلمانوں سے بھی اپیل کی کہ وہ جانوروں کی خرید وفروخت سے لے کر قربانی کی ادائیگی تک سارے مراحل میں بھیڑ بھاڑ سے گریز کریں اور حسب معمول صاف صفائی کا خصوصی اہتمام کریں۔
اس تعلق سے بتایا گیا کہ مسلمانوں کو درپیش مسائل کا فوری حل نکالنے کے لئے مختلف ذمہ داران پر مشتمل ایک وفد وزیر اعلٰی ادھو ٹھاکرے سے بھی ملاقات کرے گا اور ان مسائل کو اُن کے سامنے پیش کیا جائے گا۔
پریس کانفرنس میں مولانا محمود دریابادی (علماء کونسل)، حافظ اطہر علی (مہتمم داالعلوم محمدیہ) ، مولانا حلیم اللہ قاسمی صاحب(جمعیت علماء - ارشد مدنی)، مولانا عبدالسلام سلفی صاحب(جمعیت اہل حدیث)، مولانا اعجاز کشمیری صاحب( اہلسنت والجماعت)، مولانا حافظ ندیم صدیقی(جمعیت علماء - محمود مدنی)، مولانا سید محمد فیاض باقر صاحب(شیعہ اثنا عشری)، جناب فرید شیخ صاحب (ممبئی امن کمیٹی)، ڈاکٹر سلیم خان صاحب ( نائب امیر جماعت اسلامی ہند حلقہ مہاراشٹرا )، عبد الحسیب بھاٹکر صاحب (جماعت اسلامی ہند ممبئی) موجود تھے، ہر ایک نے اپنی اپنی بات پیش کرتے ہوئے عیدالاضحیٰ کے موقع پر مسلمانوں کو امن و امان کے ساتھ جانوروں کی قربانی پیش کرنے حکومت سے ہرممکن سہولت فراہم کرنے کی درخواست کی۔