کٹھمنڈو 4/نومبر(ایس او نیوز) مغربی نیپال کے علاقے جاجرکوٹ میں 6.4 شدت کے زلزلے کے نتیجے میں 156 افراد ہلاک ہوگئے، جبکہ سینکڑوں زخمی ہو گئے، شدید زلزلے کے باعث متعدد عمارتیں زمین بوس ہوگئیں۔
میڈیا رپورٹوں کے مطابق زلزلے کے چار جھٹکے جمعہ کی شب کو محسوس کئے گئے۔ بتایا گیا ہے کہ 11:47، 12:08، 12:29 اور 12:35 پر بالترتیب 6.4، 4.8، 4.2 اور 4.3 شدت کے زلزلے ریکارڈ کئے گئے۔
رپورٹوں کے مطابق زلزلے کا مرکز کھٹمنڈو سے 250 میل شمال مشرق میں واقع تھا، جس کی گہرائی 11 میل ریکارڈ کی گئی ہے۔
رپورٹ کے مطابق امریکی زلزلہ پیما مرکز کا کہنا ہے کہ زلزلے کی شدت 5.6 ریکارڈ کی گئی ہے، البتہ نیپالی زلزلہ پیما مرکز نے زلزلے کی شدت 6.4 بتائی تاہم جرمن ریسرچ سینٹر فار جیو سائنسز نے شدت 5.7 بتائی ہے۔
رپورٹوں کے مطابق نیپال میں آنے والے زلزلے کے جھٹکے دہلی این سی آر سمیت شمالی ہندوستان کے کئی اضلاع میں بھی محسوس کئے گئے۔ کئی علاقوں میں زلزلے کے جھٹکے اتنے شدید تھے کہ لوگوں میں خوف وہراس پھیل گیا اور لوگ گھروں سے باہر نکل آئے۔
نیپال میں زلزلے سے متاثرہ علاقوں میں امدادی سرگرمیاں شروع کر دی گئی ہیں، کئی عمارتوں اور انفرااسٹرکچر کو بھی شدید نقصان پہنچا ہے، ملبے میں پھنسے لوگوں کو نکالنے کیلئے کارروائیاں تیز کردی گئی ہیں۔ حکام نے کئی لوگوں کے ملبے تلے پھنسے ہونے کے خدشے کا اظہار کرتے ہوئے ہلاکتوں میں اضافے کا بھی امکان ظاہر کیا ہے۔
یاد رہے کہ اپریل 2015 میں نیپال میں آئے زلزلے میں قریب نو ہزار لوگوں کی موت واقع ہوئی تھیں جبکہ بے حساب لوگ زخمی ہوئے تھے ۔