وزیر اعظم اور بی جے پی ملک میں واحد جماعتی حکومت کے قیام کے خواہاں؛ 141 ارکانِ پارلیمنٹ کو اسی لئے معطل کیا گیا ہے۔ کھر گے کی حکومت پر تنقید
نئی دہلی ۔ 20 دسمبر ( ایس او نیوز/پی ٹی آئی) صدر کانگریس ملیکار جن کھرگے نے چہار شنبہ کے روز وزیر اعظم اور بی جے پی پر الزام لگایا کہ وہ ملک میں واحد جماعتی حکومت قائم کرنا چاہتے ہیں اور یہی وجہ ہے کہ پارلیمنٹ سے ایم پیز کو معطل کیا جا رہا ہے۔
کانگریس قائد نے کہا کہ 141 ارکانِ پارلیمنٹ کو معطل کیا گیا ، کیوں کہ وہ لوگ پارلیمنٹ میں سنگین سیکوریٹی کوتاہی پر وزیر داخلہ سے بیان دینے کا مطالبہ کر رہے تھے ۔ بی جے پی ایم پی جس نے مداخلت کاروں کے داخلہ کی راہ ہموار کی تھی ، آزادانہ گھوم رہے ہیں اور ان سے ابھی تک پوچھ تاچھ بھی نہیں کی گئی ہے۔
انھوں نے ایکس پر اپنے ایک پوسٹ میں کہا کہ آخر یہ کس قسم کی تحقیقات ہیں؟ پارلیمانی سیکوریٹی کے ذمہ دار سینئر عہدیداروں کو جوابدہ کیوں نہیں بنایا گیا ؟ اب تک کئی سربراہوں کو ہٹا دیا جانا چاہیے تھا۔ کھر گے نے کہا کہ بظاہر مداخلت کار ، کئی ماہ سے اس کی منصوبہ بندی کر رہے تھے۔ انھوں نے سوال کیا کہ انٹلیجنس کی اس بڑی ناکامی کے لیے کون ذمہ دار ہے؟ پارلیمنٹ کی کئی گھیروں پر مشتمل سیکوریٹی کے پیش نظر آخر دونوں مداخلت کار کس طرح اپنے جوتوں میں زرد گیس کے کنستر چھپا کر عمارت میں داخل ہونے میں کامیاب ہوئے اور ہندوستانی جمہوریت کے مقدس مرکز پر پہنچ گئے کھر گے نے اپنے پوسٹ میں کہا کہ وزیر اعظم اور ان کی یہ پارٹی ملک میں واحد جماعتی حکومت قائم کرنا چاہتے ہیں ۔وہ لوگ ایک اکیلا کی بات کرتے ہیں جو جمہوریت کو مسمار کرنے کے مماثل ہے۔ یہی وجہ ہے کہ انھوں نے ارکانِ پارلیمنٹ کو معطل کیا ہے۔ انہوں نے کہا کہ اس سیکوریٹی کوتاہی کے لیے اعلیٰ عہدوں پر فائز افراد کو سزا دینے کے بجائے انھوں نے ایم پیز کے جمہوری حقوق کو ہی چھین رہے ہیں اور اپنی جوابدہی سے بچنے کی کوشش کررہے ہیں۔