پارٹی کی شبیہ کو مسخ کرنے کی حرکتیں ناقابل قبول:مودی
نئی دہلی،3؍جولائی (ایس او نیوز؍یو این آئی) وزیر اعظم نریندر مودی نے بھارتیہ جنتا پارٹی کے امیج کو نقصان پہنچانے والی حرکتوں کو ناقابل قبول قرار دیتے ہوئے کہا کہ پارٹی کے رکن پارلیمان سے لے کر ہر چھوٹا بڑا کوئی بھی کارکن اگر غلط کام کرتا ہے تو اس پر کارروائی ہونی چاہئے -وزیر اعظم نے منگل کو یہاں پارلیمنٹ ہاوز کے احاطے میں بی جے پی پارلیمانی پارٹی کی پہلی میٹنگ سے خطاب کرتے ہوئے یہ بات کہی- بی جے پی کے رکن پارلیمان اور ترجمان راجیو پرتاپ روڈی نے یہاں نامہ نگاروں کو بتایا کہ وزیر اعظم نے کہا ہے کہ گھمنڈغرور یا بدسلوکی جس سے پارٹی کے امیج کو نقصان پہنچتا ہو ناقابل قبول ہے اور اگر کوئی ایسا کرتا ہے تو اس کے خلاف کارروائی ہونی چاہئے -ذرائع کے مطابق وزیر اعظم نے یہ تبصرہ بی جے پی کے جنرل سکریٹری کیلاش وجے ورگیہ کے رکن اسمبلی بیٹے آکاش وجے ورگیہ کے اندور میونسپل کارپوریشن کے افسر کو بلے سے مارنے کے واقعہ کے پس منظر میں کیا تھا-ذرائع کے مطابق میٹنگ میں اراکین پارلیمان نے وزیر اعظم اور بی جے پی کے کارگذار صدر جے پی نڈا کا خیر مقدم کیا- ذرائع نے بتایا کہ وزیر اعظم نے اراکین پارلیمان سے اپیل کی کہ وہ6 جولائی سے شروع ہونے والی رکنیت سازی میں سرگرمی سے حصہ لیں -انہوں نے کہا کہ ہر بوتھ میں کم سے کم پانچ درخت بھی لگائے جائیں - انہوں نے اراکین پارلیمان سے جل شکتی مہم میں بھی بڑھ چڑھ کر حصہ لینے اور لوگوں کو پانی بچانے کے تئیں بیدار کرنے میں اپنا رول ادا کرنے کی بھی اپیل کی-میٹنگ میں وزیر دفاع راج ناتھ سنگھ بی جے پی صدر امیت شاہ اور بی جے پی رکنیت مہم کے قومی کنوینر شیو راج سنگھ چوہان بھی موجود تھے -