بھٹکل،9 / جون (ایس او نیوز) ضلع انچارج اور وزیر برائے ماہی گیری ، بندرگاہ و بری نقل و حمل  منکال وئیدیا نے سرکاری پرائمری اور ہائی اسکول کے ہیڈ ماسٹروں کے ساتھ ایک جائزاتی میٹنگ منعقد کی اور تعلیمی و تدریس کے تعلق سے درپیش مسائل کی جانکاری حاصل کی۔ 
    
اربن بینک کے ہال میں منعقدہ اس میٹنگ میں منکال وئیدیا نے طلبہ کو بہترین تعلیم دینے کی ضرورت پر  زور دیتے ہوئے اساتذہ کو اپنی ذمہ داری پورے خلوص کے ساتھ نبھانے کی نصیحت کی ۔ انہوں نے کہا کہ اساتذہ کو چاہیے وہ جس اسکول میں بھی تدریسی ذمہ داری پر ہیں اسے اپنا ہی سرکاری اسکول سمجھیں اور مقامی لوگوں کے تعاون سے اسکول کی ترقی کے لئے اقدامات کریں ۔ چونکہ سرکاری اسکولوں میں زیادہ تر غریب بچے داخلہ لیتے ہیں اس لئے میری خواہش ہے کہ انہیں بہترین اور معیاری تعلیم فراہم کی جائے۔ 
    
میٹنگ میں شریک اساتذہ نے وزیر منکال وئیدیا کے سامنے سرکاری اسکولوں میں درپیش مسائل کی لمبی فہرست پیش کی جس میں زیادہ کمپاونڈ وال ، پانی کی سہولت ، واش روم ، کچن رومس ، کلاس رومس وغیرہ نہ ہونے کی شکایات شامل تھیں۔ 

وزیر موصوف نے کہا کہ میرا مقصد بس اتنا ہے میرے حلقہ میں طلبہ کے لئے تعلیم حاصل کرنے کی راہ میں کسی قسم کی رکاوٹ نہیں آنی چاہیے ۔ اس لئے اسکولوں میں چاہے جو بھی مسائل ہوں اور جس چیز کی بھی کمی ہو اسے درست کرنا میری ذمہ داری ہے ۔ میں چاہتا ہوں کہ ہمارے حلقہ کے اسکولوں کو ریاستی سطح پر مثالی اسکولوں میں تبدیل کیا جائے ۔ میں کسی بھی طرح اساتذہ کے لئے کوئی مشکل کھڑی نہیں کروں گا ۔ حالانکہ بعض لوگوں نے میرے لئے مشکلات کھڑی کی تھیں ، مگر میں نے اسے بھلا دیا ہے ۔ لہٰذا جس کسی اسکول میں بھی کسی بھی چیز کی ضرورت ہے تو اس کی فہرست بنا کر مجھے پیش کریں ، اسے مہیا کرنے کا انتظام کیا جائے گا۔ 
    
اس موقع پر تعلقہ پنچایت کے عبوری سی ای او پربھاکر چیکمنے، عبوری بی ای او شاردا نائیک وغیرہ موجود تھے۔