بھٹکل میں منی ٹرک نے آٹو رکشہ کو دی ٹکر؛ دو کی حالت نازک
بھٹکل 15 فروری (ایس او نیوز) ٹاٹا ایس منی ٹرک اور آٹو رکشہ کے درمیان ہوئی ٹکر میں دو لوگ شدید زخمی ہوگئے جنہیں بھٹکل سرکاری اسپتال میں ابتدائی طبی امداد کے بعد منی پال شفٹ کیا گیا ہے۔ ان کی شناخت منجمّا موگیر (40) اور وینکٹ رمن نائک (52) کی حیثیت سے کی گئی ہے۔ منجمّا بھٹکل مچھلی مارکٹ کے لئے نکلی تھی، جبکہ وینکٹ رمن نائک مزدوری کے لئے بھٹکل شہر کی طرف جانے کے لئے آٹو پر سوار ہوا تھا۔ آٹو پر ایک اور مسافر منجوناتھ بھنڈاری (53) انجمن کالج جانے کے لئے نکلا تھا، جسے معمولی چوٹیں آئی ہیں،ا سی طرح آٹو رکشہ ڈرائیور پانڈو ماستپّا نائک(38) کو بھی معمولی چوٹیں آئی ہیں۔ یہ چاروں بیلکے کے رہائشی ہیں۔
حادثہ بھٹکل سرپن کٹہ نیشنل ہائی وے 66 پر جمعرات صبح قریب 8:30 بجے پیش آیا۔
پتہ چلا ہے کہ آٹو بیلکے سے تین مسافروں کو لے کر بھٹکل شہر کی طرف جارہا تھا ، عینی شاہدین نے بتایا کہ اس دوران مخالف سمت سے آنے والی ٹا ٹا ایس منی وین بے قابو ہوکر ڈیوائیڈر پر چڑھتے ہوئے ان کی آٹو سے ٹکراگئی۔ پولس نے بتایا کہ آٹو سے ٹکرانے کے بعد وین ڈرائیور موقع پر سے فرار ہوگیا۔
ٹکر لگتے ہی دو مسافر منجمّا اور وینکٹ رمن آٹو سے باہر جاگرے اور شدید زخمی ہوگئے ان دونوں کو فوری طور پر بھٹکل سرکاری اسپتال لے جایا گیا تھا، لیکن حالت نازک ہونے کی بنا پربعد میں منی پال اسپتال شفٹ کیا گیا ہے۔
ٹکر کی شدت کا اندازہ اس بات سے لگایا جاسکتا ہے کہ حادثے میں آٹو رکشہ کے پرخچے اُڑگئے ہیں اور کافی نقصان پہنچا ہے۔
بھٹکل مضافاتی پولس تھانہ میں معاملہ درج کیا گیا ہے۔