منگلورو، 8 / اپریل (ایس او نیوز) ساحلی پٹی پر گرمی کی شدت اپنی انتہا پر ہے جس کے چلتے پارہ 40 ڈگری کے نشان کو چھو گیا ہے اور لُو کی لہریں چلنے کے امکانات پیدا ہو گئے ہیں ۔ اس صورتحال کو دیکھتے ہوئے دکشن کنڑا اور اڈپی ضلع میں لُو سے متاثرہ افراد کے علاج کے لئے سرکاری اسپتالوں میں تیاریاں کر لی گئی ہیں اور بستروں کو مختص کر دیا گیا ہے ۔ 
    
 ذرائع سے ملی اطلاع کے مطابق منگلورو کے وینلاک اسپتال میں 8 بستروں والا ایک آئی سی یو اور 18 بستروں والا جنرل وارڈ لُو کی لہروں سے متاثرہ افراد کے لئے مختص کیے گئے ہیں ۔ جبکہ اڈپی کے ڈسٹرکٹ ہاسپٹل میں 5 بستروں والا ایک وارڈ مختص کیا گیا ہے ۔
    
اس کے علاوہ بیلتنگڈی، سولیا، پتور، بنٹوال، اڈپی، کارکلا اور کنداپور کے ہر تعلقہ اسپتال میں دو بستر اسی مقصد سے مختص کیے گئے ہیں ۔ لُو سے متاثرہ افراد کے لئے مختص کیے گئے ان بستروں والے کمروں میں تمام ضروریہ دوائیوں، ایئر کنڈیشنرس اور ہر وقت مہیا رہنے والے ایک ماہر ڈاکٹر کا انتظام کیا گیا ہے ۔ 
    
یاد رہے کہ شدید گرمی کے موسم جب لُو چلتی ہے تو سب سے زیادہ چھوٹے بچے اس سے متاثر ہوتے ہیں ۔ لُو لگنے کی علامات میں اچانک بے ہوشی، جسم کے پٹھوں میں اینٹھن، مرگی کے دورے، چڑچڑا پن، سر درد، بڑی مقدار میں پسینے کا اخراج، کمزوری، غنودگی، حرکت قلب ، نبض کی رفتار اور جسمانی حرارت میں اضافہ، قئے اور کھڑے رہنے میں دشواری وغیرہ شامل ہے ۔ 
    
لُو لگنے کی صورت میں فوری ابتدائی طبی امداد کے طور پر جسم کو گیلے کپڑے سے پوچنا اور ڈھانکنا، متاثرہ شخص کو بستر یا فرش پر لٹا کر اسے پیر تھوڑے سے اوپر کی طرف اٹھانا اور تیز پنکھا چلانا شامل ہے ۔ اگر کوئی متاثرہ بچہ یا شخص لو لگنے کی وجہ سے بے ہوش ہوا ہے تو اسے پانی پلانے یا کوئی غذا دینے سے پرہیز کریں ۔ اگر متاثرہ شخص کی طبیعت بہت زیادہ بگڑ رہی ہو تو فوری طور پر طبی امداد کے لئے اسپتال لے جائیں ۔ 
    
طبی ماہرین نے بتایا ہے کہ اگر لُو چلنے کی وجہ سے جسمانی درجہ حرارت 41.5 یا اس سے زیادہ ہو جاتا ہے تو پھر یہ حالت جان لیوا ہو سکتی ہے ۔ اس لئے احتیاطی طور پر دوپہر کے وقت سخت مشقت والے کاموں سے گریز کیا جائے ۔ خوب پانی پیا جائے ۔ شکر اور کاربونیٹ کیے گئے ڈرنکس سے گریز کیا جائے ۔ ہلکے رنگوں والے کپڑے پہنے جائیں ۔