لکھنؤ 11/ مارچ (ایس او نیوز)  403 سیٹوں والی اترپردیش اسمبلی انتخابات کے ووٹوں کی گنتی میں BJP کی جیت کے اعداد و شمار 300 سیٹوں کے پار جا رہے ہیں. ایک طرف جہاں BJP نے 2014 لوک سبھا انتخابات میں ملی جیت کا سلسلہ اُتر پردیش انتخابات میں بھی برقرار رکھا ہے، وہیں بہوجن سماج پارٹی (BSP) سربراہ مایاوتی نے پارٹی پر الیکٹرانک ووٹنگ مشین (EVM) کے ساتھ چھیڑ چھاڑ کرکے انتخابی نتائج کو متاثر کرنے کا سنسنی خیز الزام لگایا ہے. مایاوتی نے ایک پریس کانفرنس منعقد کرتے ہوئے BJP کو اتراکھنڈ اور اتر پردیش میں دوبارہ انتخابات کروانے کا چیلنج دیا. انہوں نے الیکشن کمیشن سے اپیل کی  کہ دونوں ریاستوں کے نتائج کو فوری طور پر مسترد کر دیا جائے اور ووٹنگ مشین کی جگہ بیلیٹ پیپر کی پرانے نظام سے دوبارہ انتخابات کروایا جائے.

مایاوتی نے کہا کہ ان کی پارٹی نے اس سلسلے میں الیکشن کمیشن کو ایک خط لکھ کر شکایت کی ہے. مسلم اکثریتی علاقوں میں بھی BJP کو اچھا خاصا عوامی حمایت ملنے پر تعجب کرتے ہوئے مایاوتی نے الزام لگایا، 'پارٹی کی طرف سے حاصل رپورٹوں کے مطابق، مسلم اکثریت والے علاقوں میں بھی زیادہ تر ووٹ BJP کو ہی چلے گئے ہیں. اس سے ان خدشات کو تقویت ملتی ہے کہ ووٹنگ مشینوں کے ساتھ چھیڑ چھاڑ ہوئی ہے. انہوں نے سوال کیا کہ جن علاقوں میں مسلم سماج کا ووٹ 18 سے 20 فیصد ہے، وہاں بھی ان کا ووٹ BJP کو جائے، کیا یہ بات آپ کے گلے کے نیچے اتر رہی ہے؟ BJP نے ایک بھی مسلمان کو ٹکٹ نہیں دیا تھا. دنیا میں کوئی بھی  اس بات پر یقین نہیں کرے گا. '

مایاوتی نے 2014 کے لوک سبھا انتخابات کا ذکر کرتے ہوئے کہا کہ اُس وقت بھی ایسے ہی خدشات ظاہر کئے گئے تھے. انہوں نے کہا، 'بنا  گڑبڑی کئے BJP کو اتنے ووٹ نہیں مل سکتے تھے.' مایاوتی نے الزام لگایا کہ انتخابات کے دوران کئی مقامات پر ایسی بحث تھی کہ ووٹنگ مشین میں کوئی بھی بٹن دبائیں، لیکن ووٹ BJP کو ہی جاتا ہے. انہوں نے کہا، 'ایسی ہی شکایت مہاراشٹر میونسپل انتخابات کے دوران بھی سننے کو ملی تھی. تب ان باتوں پر دھیان نہیں دیا گیا. آخری مرحلے کی پولنگ سے ایک روز قبل (7 مارچ) میری طرف سے منعقد ایک پریس کانفرنس میں بھی ایک صحافی نے سب کے سامنے ایسا ہی ایک سوال اٹھایا تھا. آپ سب اس بات کے گواہ ہیں. اس صحافی نے ٹوپی لگا رکھی تھی. اس نے ایسا ہی ایک سوال مجھ سے پوچھا تھا. اس نے کہا تھا کہ آپ لوگوں کے سارے ووٹ تو BJP کو جا رہے ہیں، لیکن پھر مجھے اس بارے میں علم نہیں تھا. میں نے اس وقت اس کو نظر انداز کر دیا تھا. مجھے لگا تھا کہ وہ یوں ہی بول رہا ہے، لیکن آج مجھے احساس ہوا کہ وہ ٹھیک کہہ رہا تھا. '

مایاوتی نے اسے جمہوریت کے لئے سنگین خطرہ بتاتے ہوئے کہا، 'لوک سبھا انتخابات، اتراکھنڈ اور اتر پردیش کے انتخابی نتائج کو دیکھ کر پتہ چلتا ہے کہ یہ بہت سنگین معاملہ ہے. اسے نظر انداز کرنا ہماری جمہوریت کے لئے مہلک ثابت ہو سکتا ہے. میں BJP کو چیلنج دیتی ہوں. آج جو BJP کے لوگ خوش ہو رہے ہیں کہ انہیں اکثریت مل گئی ہے، تو ایسا انہوں نے گڑبڑی کرکے حاصل کیا ہے. میں امت شاہ اور نریندر مودی کو چیلنج دیتی ہوں کہ اگر وہ ایماندار ہیں اور انہیں لگتا ہے کہ جو ووٹ انہیں ملا ہے وہ صحیح ہے تو وہ الیکشن کمیشن سے اپیل کرکے ووٹنگ مشین سے ہوئے ان  انتخابات کو مسترد کروائیں اور پرانے نظام کے تحت بیلٹ پیپر سے دوبارہ انتخابات کروائیں. اس سے دودھ کا دودھ اور پانی کا پانی ہو جائے گا.

مایاوتی نے مزید کہا، 'امریکہ میں بھی ووٹنگ مشین سے منسلک ایسی شکایتیں سامنے آئی تھیں. اس کے بعد وہاں پھر سے  بیلٹ پیپر  کا انتظام اپنایا گیا. 2019 میں بھی اگر ایسے ہی الیکشن ہوا تو مخالف جماعتوں کا الیکشن لڑنا بے معنی ہوگا. عوام کا بھی EVM پر سے اعتماد اٹھ گیا ہے. مسلم معاشرے کے لوگ کہہ رہے ہیں کہ جب انہوں نے BJP کو ووٹ دیا ہی نہیں تو پھر اسے ووٹ ملا کیسے؟ ' گوا اور پنجاب میں BJP کی خراب کارکردگی پر تبصرہ کرتے ہوئے مایاوتی نے کہا، 'گوا اور پنجاب میں BJP نے ایسی چھیڑ چھاڑ نہیں کی کیونکہ ان کو پکڑے جانے کا خدشہ  تھا. انہیں پتہ تھا کہ وہاں ایسا کرنے پر گڑبڑی سب کے سامنے آ جائے گی. انہوں نے اُتر پردیش اور اتراکھنڈ میں اپنا یہ داؤ کھیلا ہے۔