منگلورو:لاپتہ چئیترا ہیبار کا قطر میں چلا پتہ : عاشق شاہ رُخ کو ہماچل پردیش میں کیا گیا گرفتار؛ اُلّال لاکر پوچھ تاچھ کے بعد پولس نے کیا رہا
منگلورو :2مارچ؍ (ایس اؤ نیوز )اُلال سے لاپتہ ہونے والی پی ایچ ڈی کی طالبہ چئیترا ہیبار خلیجی ملک قطر میں موجود ہونے کا پتہ چلا ہے، جبکہ ذرائع نے خبر دی ہے کہ اُلال پولس اس کے عاشق شاہ رخ کو ہما چل پردیش پہنچ کر اپنی تحویل میں لےکر اُلال پہنچی، پھر پوچھ تاچھ کے بعد چھوڑ دیا۔
میڈیا رپورٹوں کے مطابق ضلع دکشن کنڑا کے پتور کی مکین چئیترا ہیبار اپنے عاشق شاہ رُخ کے تعاون سے وزٹ ویزا پر بیرونی ملک جانے کی اطلاع ہے۔ بتایا گیا ہے کہ اس کے عاشق شاہ رُخ ضلع دکشن کنڑا کے بنٹوال کا رہنے والا ہے۔
دیرل کٹے کی پرائیویٹ یونیورسٹی میں تحقیق کے شعبہ پی ایچ ڈی میں زیر تعلیم چئیترا ہیبار گذشتہ 17 فروری کو اپنی قیام گاہ کوٹیکارو ماڈور کے پی جی سے اپنی اسکوٹر سمیت لاپتہ ہوگئی تھی۔ 18فروری کو شاہ رخ بھی لاپتہ ہوگیا تھا۔ چئیترا کی اسکوٹر سورتکل میں پائی گئی ۔پولس کو خبرملی تھی کہ وہ وہیں سے بنگلوروپہنچی ہے۔
منگلورو جنوبی سب ڈویزن کے اے سی پی دھنیا نایک اور اُلال کے پی ایس آئی شیتل الگور کی قیادت والی ٹیم چئیترا ہیبار کی تلاش مہم چلانے کے دوران پتہ چلا کہ چئیترا بنگلورو سے گوا۔ ممبئی ہوتے ہوئے ہماچل پردیش کےمنالی پہنچ گئی ہے۔ پھر پولس کو اس بات کی بھی جانکاری ملی کہ چئیتراہیبار اپنے اکاؤنٹ سے 40،000روپئے نکالنے کے بعد ہماچل پردیش سے دہلی ہوائی اڈہ پہنچ کر قطر چلی گئی۔
چئیترا کے عاشق شاہ رخ کو اُلال پولس نے جمعرات کو ہماچل پردیش میں اپنی تحویل میں لیا اور پو چھ تاچھ کی ۔ پوچھ تاچھ کے دوران شاہ رخ نےچئیترا سے پیا رکرنے کی بات قبول کی ہے۔ شاہ رخ سے پوچھ تاچھ کے بعد پولس نے بتایا کہ دونوں بالغ ہیں اس وجہ سے اسے چھوڑ دیا ہے۔ شاہ رخ اس سے قبل بیرونی ملک میں تھا اور ایک معاملہ میں جیل کی ہوا بھی کھاچکا ہے۔ اسی بنا پر چئیترا کے ساتھ شاہ رخ کا قطر جانا ممکن نہیں ہوا ہے۔
لیکن تعجب کی بات یہ ہےکہ اتنی جلدی چئیترا کو قطر کا ویزا کیسے ملا، ویز ا بھیجنے والا کون ہے ۔گہرا شک جتایاجارہاہے کہ عاشق شاہ رخ نے چئیترا کے قطر جانے میں تعاون کیاہوگا۔ فی الحال چئیترا قطر کے ایک لیڈی پی جی میں مقیم ہونےکی اطلاعات موصول ہوئی ہیں۔ پولس ذرائع کے مطابق قطر کی انڈین ایمباسی سے چئیترا نے اُلال پولس تھانہ کو ای۔ میل اور واٹس اپ کے ذریعے پیغام بھیجتے ہوئےکہاہےکہ وہ باشعور ہے ، اور اپنی مرضی سے قطر پہنچی ہیں، اُس نے سوال کیا ہے کہ کیا اُسے پیار کرنے کا حق نہیں ہے ؟ ۔ چئیترا ہیبار کے لاپتہ معاملے کو لےکر ہندو تنظیموں نے پولس پر دباؤ بنایا تھا کہ معاملے کا پتہ لگائیں۔ دوسری طرف چئیترا کی چال پولس کے لئے سر درد بنی ہوئی ہے۔