شیوسینا نے دیا این سی۔ پی کانگریس کے ساتھ حکومت بنانے کااشارہ، کہا مہاراشٹر دہلی کا غلام نہیں
ممبئی،10نومبر(ایس او نیوز/آئی این ایس انڈیا) مہاراشٹر میں وزیر اعلی کے عہدے کو لے کر بی جے پی اور شیو سینا کے درمیان تکرار کم ہونے کا نام نہیں لے رہی۔ریاست میں حکومت بنانے کا معاملہ دن بہ دن الجھتا ہی جا رہا ہے۔شیوسینا نے این سی پی اور کانگریس کے ساتھ مل کر حکومت بنانے کے اشارے دئے ہیں۔سنجے راوت کے حوالے سے کہا گیا کہ اب حالت ایسی ہے کہ اس بار مہاراشٹر کا وزیر اعلی کون ہوگا؟ یہ ادھو ٹھاکرے طے کریں گے۔ریاست کے بڑے لیڈر شرد پوار کا کردار اہم ہو گا۔کانگریس کے کئی رکن اسمبلی سونیا گاندھی سے مل کر آئے ہیں۔سنجے راوت نے بھی سونیا گاندھی سے کہا ہے کہ مہاراشٹر کا فیصلہ مہاراشٹر کو سونپے،کچھ بھی ہو لیکن دوبارہ بی جے پی کا وزیر اعلی نہ ہو، یہ مہاراشٹر کی واحدآواز ہے۔
شیوسینا نے اپنے ترجمان اخبار ’سامنا‘ کے مضمون میں لکھا ہے مہاراشٹر کی سیاست مہاراشٹر میں ہی ہو۔مہاراشٹر دہلی کا غلام نہیں ہے۔اتنا ہی نہیں شیوسینا نے بی جے پی کاموازنہ ہٹلر سے کر دیا ہے۔شیوسینا نے کہا ہے پانچ سال اوروں کو ڈر دکھا کر حکومت کرنے والی ٹولی آج خود خوفزدہ ہے،یہ الٹا حملہ ہوا ہے۔شیوسینا نے آگے لکھا کہ جب ڈراکر بھی راستہ اور حمایت حاصل نہیں، پھر ایک بات قبول کرنی چاہئے کہ ہٹلر مر گیا ہے اور غلامی کے سائے ہٹ گئے ہیں۔پولیس اور دیگر جانچ ایجنسیوں کو اس کے آگے تو بے خوف ہوکر کام کرنا چاہئے،یہ نتیجہ کا یہی مطلب ہے۔