اب ڈی آئی جی صاحب کے ہی خلاف لگا چھیڑچھاڑکا الزام، ریلوے افسر کی بیوی نے درج کرایا معاملہ
نئی دہلی،15/جولائی (ایس اونیوز/ آئی این ایس انڈیا) پیر کی صبح چلتی ٹرین میں ریلوے افسر کی بیوی سے چھیڑ چھاڑ کے معاملے میں ریلوے پروٹیکشن فورس (آر پی ایف) کے انسپکٹر جنرل وجے کھاترکر کے خلاف مقدمہ درج کیا گیا ہے۔ حالانکہ ذیلی انسپکٹر جنرل (ڈی آئی جی) کی گرفتاری ابھی تک نہیں ہو پائی ہے۔سرکاری ریلوے پولیس (جی آر پی) کے سپرنٹنڈنٹ سنیل جین نے بتایاکہ سینئر ڈویژنل سطح کے ریلوے افسر کی بیوی اپنی 6 سال کی بیٹی کے ساتھ اندور-جبل پور اوور نائٹ ایکسپریس سے جبل پور آ رہی تھی۔اے سی -1 کوچ میں ان کا ریزرویشن تھا۔ان کے سامنے والی سیٹ پر جبل پور آر پی ایف میں ڈی آئی جی وجے کھاترکر سفر کر رہے تھے۔انہوں نے کہاکہ آج صبح نرسنگہپور-شریدھام کے درمیان (گاڈروارا جی آر پی تھانہ علاقے میں) ڈی آئی جی نے خواتین مسافر کے ساتھ چلتی ٹرین میں نازیبا حرکت کی جس کا خاتون نے مخالفت کرتے ہوئے چلانا شروع کر دیا۔ خاتون کی آواز سن کر سفر کر رہے دیگر لوگ بھی جمع ہو گئے۔جین نے بتایاہے کہ ٹرین کے جبل پور پہنچنے پر خاتون نے ڈی آئی جی کے خلاف جی آر پی تھانے میں رپورٹ درج کرائی۔انہوں نے کہاہے کہ جی آر پی نے آر پی ایف ڈی آئی جی کے خلاف 354۔اے (جنسی حملہ) کے تحت کیس درج کر لیا ہے اور تحقیقات کرنے کے لیے کیس ڈائری کو گاڈروارا جی آر پی تھانے بھیجا جا رہا ہے۔جبل پور سے گاڈروارا تقریباً130 کلو میٹر دور ہے۔جین نے بتایا کہ ابھی تک ملزم ڈی آئی جی کی گرفتاری نہیں ہو پائی ہے۔