بھٹکل 23/اپریل (ایس او نیوز) لوک سبھا انتخابات کے تیسرے مرحلے کے انتخابا ت 15 ریاستوں کی  کل 117 سیٹوں پر انتخابات آج شام کو مکمل ہوئے مگر اس دوران سماج  وادی پارٹی کے سربراہ اکھلیش یادو نے  الزام لگایا    کہ  الیکٹرانک ووٹنگ مشینوں پر کسی بھی پارٹی کو    ووٹ ڈالنے پر  بی جے پی کو ووٹ جارہے ہیں، اسی طرح کا الزام کیرالہ کے کانگریسی لیڈر ششی تھرور نے بھی لگایا   جہاں    ای وی ایم  ابتدائی دو گھنٹوں تک  خراب ہونے کی شکایت موصول ہوئی تھی۔ آج کے انتخابی مرحلہ کے دوران کیرالہ میں پولنگ کرنے قطار میں کھڑے دو لوگوں کی موت واقع ہونے کی بھی خبر ملی۔

انتخابات کے تیسرے مرحلے میں اہم لیڈران کی قسمت کے فیصلے آج الیکٹرانک مشینوں میں بند ہوگئے، جس میں کانگریس چیف راہول گاندھی، بی جےپی صدر امیت شاہ، سابق مرکزی وزیر ششی تھرور، سابق اُترپردیش وزیراعلیٰ ملائم سنگھ یادو   جیسے لیڈران شامل ہیں۔

خیال رہے کہ تیسرے مرحلے کی پولنگ میں  بہار کی 5، اتر پردیش کی 10، مغربی بنگال کی 5، مہاراشٹر کی 14، کرناٹک کی 14، گجرات کی سبھی 26، جموں و کشمیر کی 1، اڈیشہ کی 6، آسام کی 4، تمل ناڈو کی 1، چھتیس گڑھ کی 7، کیرالہ کی سبھی 20، گوا کی 2، تریپورہ کی 1، دادر حویلی اور دمن دیو کی 1 سیٹ پر ووٹ ڈالے جا رہے ہیں۔ جن 117 سیٹوں پر ووٹنگ ہو رہی ہے وہاں مجموعی طور پر 1622 امیدوار میدان میں ہیں۔

آج ہوئے انتخابات میں سب سے زیادہ پولنگ مغربی بنگال میں ریکارڈ کی گئی جہاں  پانچ سیٹوں پر 79.36 فیصد ووٹنگ درج کی گئی، جبکہ جموں وکشمیر میں سب کم پولنگ یعنی 12.86 فیصد درج کی گئی۔ اسی طرح اُترپردیش  اور مہاراشٹرا میں بھی  انتخابات مایوس کن رہے جہاں بالترتیب  57.74 فیصد اور  56.57 فیصد ریکارڈ کئے گئے۔

 آسام کی پانچ سیٹوں پر ہوئے انتخابات  78.29 فیصد ریکارڈ کی گئی۔ بہار کی پانچ سیٹوں پر ہوئی پولنگ   59.97 فیصد اور گوا میں  71.09 فیصد  ریکارڈ کی گئی۔اسی طرح گجرات میں  60.21 فیصد،  کرناٹک میں 67.28 فیصد ، کیرالہ میں 70.21 فیصد، اُڑیسہ میں 58.18 فیصد، تریپورہ میں 78.52 فیصد،  چھتیس گڑھ میں 65.91 فیصد، دادر اور  نگر حویلی میں 71.43 فیصد، دمن  دیو میں 65.34 فیصد ووٹنگ درج کی گئی ۔

 یوگی کے وزیر  سوامی پرساد موریہ پر ووٹنگ متاثر کرنے کا الزام، ڈی ایم نے مارا چھاپہ

اتر پردیش حکومت میں وزیر سوامی پرساد موریہ کے گھر پر بدایوں کے ضلع مجسٹریٹ نے آج چھاپہ ماری کی۔ سماجوادی پارٹی کے امیدوار دھرمیندر یادو نے سوامی پرساد موریہ کے خلاف بدایوں میں رہ کر ووٹنگ کو اثرانداز کرنے کا الزام عائد کیا تھا۔ اس شکایت کے بعد ضلع مجسٹریٹ نے موریہ کے گھر پر چھاپہ ماری کی ۔

کیرالہ میں پولنگ بوتھ میں سانپ گھس گیا

کیرالہ کے کنّور کےکنڈاکائی  پولنگ بوتھ میں اچانک سانپ گھس جانے سے تھوڑی بہت پریشانی ہوئی، مگر سانپ کو  پکڑکر باہر لے  جانے کے بعد انتخابی عمل کو آگے بڑھایا گیا۔

بیلگام میں کانگریس اور بی جےپی کارکنوں کے درمیان جھڑپ

بیلگام کے چکوڈی ، اندرا نگر گیٹ   میں  واقع پولنگ اسٹیشن 16 اور 17 کے باہر  کانگریس اور بی جےپی کارکنوں کے درمیان  معمولی بات کو لے کر جھڑپ کی خبر موصول ہوئی ، بتایا گیا ہے کہ  واقعے کی  اطلاع ملتے ہی اسسٹنٹ ایس پی متھن کمار جائے وقوع پر پہنچ گئے اور حالات کو قابو میں کرلیا  ۔

گوا میں کسی بھی پارٹی کو ووٹ کرو؛ ووٹ صرف بی جےپی کو؛  کانگریس اور عام آدمی پارٹی کا الزام

کانگریس اور عام آدمی پارٹی نے گوا کے بعض پولنگ بوتھوں میں  ای وی ایم اور وی وی پیٹ مشینوں   میں خرابی  پائے  جانے کا  دعویٰ کیا ہے گوا اسمبلی کے حزب مخالف لیڈر چندراکانتھ کاولیکر نے الزام لگایا  کہ  بی جے پی نے  ان مشینوں کے ساتھ  چھیڑخانی کی ہے جس کی وہ الیکشن کمیشن کو شکایت کریں گے۔ گوا کے کنکولم اور کویپم حلقوں میں ای وی ایم میں خرابی پائی جانے پر انہوں نے سخت تشویش کا اظہار کیا  اور کہا  کہ جب مشینوں  کو جانچا جارہا تھا تو یہ بات سامنے آئی کہ کسی بھی پارٹی کو ووٹ ڈالنے کا بٹن دبانے پر ووٹ صرف بی جے پی کو ہی چلا گیا۔ انہوں نے اس کے لئے بی جےپی پر الزام لگایا  کہ انہوں نے ہی  مشینوں کے ساتھ چھیڑ چھاڑ کی ہے۔

مغربی بنگال کے  مرشدآباد میں ٹی ایم سی کارکنان پر پھینکا گیا دیسی بم، 3 زخمی

مغربی بنگال میں مرشدآباد کے ڈومکل میونسپلٹی میں تین ترنمول کانگریس کارکنان ایک تصادم کے درمیان زخمی ہو گئے۔ ذرائع کے مطابق مخالفین نے ٹی ایم سی کارکنان پر دیسی بم پھینکا جس میں 3 لوگ زخمی ہو گئے۔ انھیں علاج کے لیے قریب کے اسپتال لے جایا گیا ۔ مرشد آباد میں مختلف پولنگ بوتھ کے قریب سیاسی پارٹیوں کے حامیوں کے درمیان تصادم کی خبریں موصول ہوئیں۔ تیسرے مرحلہ میں مغربی بنگال کی پانچ لوک سبھا سیٹوں پر پولنگ ہوئی  اور لوگ بڑی تعداد میں گھروں سے نکل کر انتخابی کاروائیوں میں حصہ لیا۔