مہاراشٹر میں پارلیمانی انتخابات 5مرحلوں میں ہوں گے
ممبئی، 17/ مارچ (ایس او نیوز /ایجنسی) الیکشن کمیشن نے انتخابات کی تاریخوں کا اعلان کر دیا ہے۔ ۱۹؍ اپریل سے پولنگ کا سلسلہ شروع ہو گا جو ۷؍ مختلف مرحلوں میں یکم جون تک الیکشن ہوں گے اس کے بعد ۴؍ جون کو نتائج کا اعلان کیا جائے گا۔ یاد رہے کہ اس سے قبل ۲۰۱۹ء اور ۲۰۱۴ء کے انتخابات کے نتائج ۲۶؍ مئی کو آئے تھے اور ۴؍ جون کو حلف برداری ہوئی تھی لیکن اس بات الیکشن کے مرحلوں کو تھوڑا طول دیا گیا ہے۔ جہاں تک بات ہے مہاراشٹر کی تو یہاں ۵؍ مرحلوں میں انتخابات ہوں گے۔ پہلا مرحلہ ۱۹؍ اپریل کو ہو گا جبکہ آخری مرحلے کی پولنگ ۲۰؍ مئی کو ہوگی۔
الیکشن کمیشن آف انڈیا کی فراہم کردہ اطلاعات کے مطابق یہ پانچوں مرحلے خطے وار نہیں ہوں گے بلکہ ہر مرحلے میں الگ الگ خطوں کی الگ الگ سیٹوں کیلئے ووٹ ڈالے جائیں گے۔ ہر چند کہ پولنگ کی شروعات ودربھ سے ہوگی اور پہلے مرحلے میں جن سیٹوں پر ووٹ ڈالے جائیں گے وہ تمام ودربھ میں آتی ہیں لیکن اس کے بعد ایک ہی مرحلے میں الگ الگ خطوں کی سیٹوں کو شامل کیا گیا ہے۔ جیسے دوسرے مرحلےمیں رائے گڑھ کی سیٹ بھی شامل ہے جو کہ کوکن میں ہے ساتھ ہی بارامتی کا حلقہ بھی ہے جس کا شمار مغربی مہاراشٹر میں ہوتا ہے، ساتھ ہی لاتور کی سیٹ بھی ہے جو مراٹھواڑہ میں واقع ہے۔ اس طرح سے الیکشن کمیشن نے ایک ہی مرحلے میں الگ الگ حلقوں کی سیٹوں پر الیکشن کروانے کا فیصلہ کیا ہے۔ ممکن ہے ایسا انتظامی امور میں آسانی کے پیش نظر کیا گیا ہو۔ ریاست میں ۵؍ مرحلوں میں ہونے والے انتخابات کی تاریخیں یوں ہیں :
پہلا مرحلہ: ۱۹؍ اپریل
مہاراشٹر کے پہلے مرحلے میں جن سیٹوں پر ووٹ ڈالے جائیں گے ان تمام کا تعلق ودربھ سے ہے۔ پہلے مرحلے میں ۵؍ سیٹوں پر پولنگ ہوگی جن میں سے بیشتر ایسی ہیں جہاں مائو وادیوں کا دبدبہ ہے۔ وہ سیٹیں (۱) رام ٹیک (۲) ناگپور (۳) بھنڈارہ۔ گوندیا (۴ ) گڈ چرولی۔ چمور، (۵) چندر پور
دوسرا مرحلہ: ۲۶؍ اپریل
مہاراشٹر میں دوسرے مرحلے کی پولنگ ۲۶؍ اپریل کو ہوگی جس میں کل ۸؍ سیٹوں پر ووٹ ڈالے جائیں گے۔ ان میں سے ۵؍ سیٹیں ودربھ کی ہیں جبکہ ۳؍ سیٹیں مراٹھواڑہ کی ہیں۔ ان سیٹوں کے نام ہیں (۱) بلڈانہ (۲) اکولہ(۳) امراوتی(۴) وردھا (۵) ایوت محل۔ واشم (۶) ہنگولی (۷) ناندیڑ(۸) پربھنی
تیسرا مرحلہ :۷؍مئی
تیسرے مرحلے کی پولنگ میں کل ۱۱؍ سیٹوں پر ووٹ ڈالے جائیں گے۔ ان میں کوکن، مراٹھواڑہ اور مغربی مہاراشٹر کی سیٹیں شامل ہیں۔ ان ۱۱؍ سیٹوں پر ۷؍ مئی کو ووٹ ڈالے جائیں گے۔ ان کے نام ہیں (۱)رائے گڑھ(۲) بارامتی(۳) عثمان آباد (۴) لاتور (۵) شولا پور (۶) ماڈھا ( ۷)سانگلی (۸)ستارا (۹) رتناگیری۔ سندھو درگ (۱۰) کولہاپور (۱۱) ہتھ کنگلے
چوتھا مرحلہ۱۳؍ مئی
مہاراشٹر میں تیسرے اور چوتھے مرحلے کی پولنگ کے درمیان ۶؍ دنوں کا وقفہ ہے۔ اس مرحلے میں کل ملا کر ۱۱؍ سیٹوں پر ووٹ ڈالے جائیں گے۔ چوتھے مرحلے کیلئے ۱۳؍ مئی کو پولنگ ہوگی۔ اس مرحلے میں زیادہ تر سیٹیں مغربی مہاراشٹر اور مراٹھواڑہ کی ہیں۔ ان کے نام ہیں (۱) نندور بار(۲) جلگائوں (۳) راویر(۴) جالنہ (۵) اورنگ آباد(۶) ماول (۷) پونے (۸) شیرور (۹) احمد نگر (۱۰) شیرڈی (۱۱) بیڑ
پانچوں مرحلہ : ۲۰؍ مئی
مہاراشٹر میں پانچویں اور آخری مرحلے کی پولنگ ۲۰؍ مئی کو ہوگی۔ اس میں سب سے زیادہ ۱۳؍ سیٹوں پر ووٹ ڈالے جائیں گے۔ اس میں ممبئی اور تھانے سمیت مختلف سمتوں کی سیٹیں شامل ہیں۔ ان کے نام ہیں (۱) دھولیہ(۲) دنڈوری(۳) ناسک (۴) پال گھر(۵) بھیونڈی (۶)کلیان (۷) تھانے (۸)شمال ممبئی (۹)شمال مغرب ممبئی (۱۰)شمال مشرق ممبئی (۱۱)شمال وسطی ممبئی ( ۱۲) جنوب وسطی ممبئی (۱۳) جنوبی ممبئی
یاد رہے کہ ملک بھر میں ووٹنگ کا سلسلہ الگ الگ ریاستوں میں یکم جون تک جاری رہے۔ مہاراشٹر میں یہ سلسلہ ۲۰؍ مئی کو تکمیل تک پہنچ چکا ہوگا۔ جبکہ نتائج پورے ملک میں ایک ساتھ ۴؍ جون کو آئیں گے۔ یاد رہے کہ الیکشن کمیشن کی جانب سے الیکشن کی تاریخوں کا اعلان ہوتے ہی ملک بھر میں ضابطہ اخلاق بھی نافذ ہو چکاہے۔
