نئی دہلی 16 مارچ (ایس او نیوز) الیکشن کمشنر  نے آج  لوک سبھا انتخابات 2024 کا اعلان کردیا جس کے مطابق سات مرحلوں میں انتخابات ہوں گے۔  پہلے مرحلے کی پولنگ  19 اپریل کو ہوگی،  دوسرے مرحلے کی ووٹنگ 26 اپریل کو، تیسرے مرحلے کے لیے ووٹنگ 7 مئی کو ، چوتھے مرحلے کے لیے ووٹنگ 13 مئی کو،  پانچویں مرحلے کی ووٹنگ 20 مئی کو، انتخابات کا چھٹا مرحلہ 25 مئی کو اور ساتویں اور آخری مرحلے کے انتخابات یکم جون کو ہوں گے اور  ووٹوں کی گنتی 4 جون کو ہوگی۔

 اس بار لوک سبھا انتخابات میں 543 سیٹوں کے لیے ووٹ ڈالے جائیں گے۔   تقریباً 96.88 کروڑ ووٹر 12 لاکھ سے زیادہ پولنگ اسٹیشنوں پر اپنے حق رائے دہی کا استعمال کریں گے۔ اس میں 49 کروڑ 72 لاکھ مرد ووٹر ہیں اور 47.1 کروڑ خواتین ووٹر ہیں۔ اس بار ووٹر لسٹ میں 2.3 کروڑ نئے ووٹر شامل ہوئے ہیں اور 55 لاکھ ای وی ایم کا استعمال کیا جائے گا۔

لوک سبھا انتخابات کے ساتھ ساتھ چار ریاستوں اوڈیشہ، آندھرا پردیش، سکم اور اروناچل پردیش میں اسمبلی انتخابات ہوں گے۔ انتخابات کی تاریخوں کے اعلان کے ساتھ ہی ملک میں ماڈل ضابطہ اخلاق بھی نافذ ہو گیا ہے۔ چیف الیکشن کمشنر راجیو کمار نے کہا کہ پہلے الیکشن کمیشن نے کہا تھا کہ ہم انتخابات کرانے کے لیے پوری طرح تیار ہیں۔ انہوں نے کہا کہ اس بار نوجوان ووٹرز کی اچھی تعداد ہے۔ 85 لاکھ خواتین ووٹرز ہیں جن کی عمریں 18 سے 19 سال کے درمیان ہیں۔ 19-29 سال کی عمر کے 19.74 کروڑ ووٹر ہیں۔ 1.8 کروڑ ووٹر پہلی بار ووٹ ڈالیں گے۔ اس بار 85 سال سے زیادہ عمر کے ووٹرز گھر بیٹھے ووٹ ڈال سکیں گے۔