گروہا لکشمی اسکیم کے اندراج کیلئے رقم وصول کرنے والوں پر کریمنل کیس درج ہوگا، حکومت فی اپ لوڈ کے لیے 12 روپئے ادا کررہی ہے: لکشمی ہیبالکر
بینگلورو،25؍جولائی(ایس او نیوز/ایجنسی) ریاستی وزیر بہبودی برائے خواتین واطفال لکشمی ہیبالکر نے متنبہ کیا ہے کہ اگر گروہالکشمی اسکیم کے رجسٹریشن کے عمل کے لیے لوگوں سے رقم وصول کی جاتی ہے یا اسکیم کے نفاذ میں لاپرواہی کی جاتی ہے تو ایسے افراد کے خلاف کریمنل مقدمہ درج کیا جائے گا۔
اخباری نمائندوں سے بات کرتے ہوئے انہوں نے کہا کہ تین مراکز کے لاگ آن آئی ڈی کوٹریس کرکے واپس لے لیا گیا ہے جہاں لوگ رجسٹریشن کے عمل کے لیے رقم وصول کر رہے تھے۔ انہوں نے واضح کیا کہ حکومت اس اسکیم کے غلط استعمال کو روکنے کے لیے خاموش نہیں بیٹھی ہے۔ گروہالکشمی اسکیم کے تحت رجسٹریشن کرنے والوں سے فیس وصول ہونے کی خبروں کی تصدیق ہونے پر ایسے افراد کا لاگ ان آئی ڈی اور پاس ورڈ واپس لے لیا جائیگا۔ خلاف ورزی کرنے والوں کے خلاف بھی مقدمہ درج کرنے کی تجویز دی گئی ہے۔ تحصیلداروں، پی ڈی اوز اور گاؤں کے بل کلکٹرز کو ذمہ داری دی گئی ہے کہ ایسے معاملات کی اطلاع ڈپٹی کمشنر تک پہنچائیں یا پھر کہیں بھی پیسے لئے جا رہے ہیں تواس کی اطلاع مقامی پولیس اسٹیشن کو دی جانی چاہیے۔
انہوں نے مزید کہا کہ ہم گروہالکشمی اسکیم کارجسٹریشن مفت میں نہیں کر رہے ہیں بلکہ حکومت فی اپ لوڈ کے لیے 12 روپئے ، اور پرنٹ آؤٹ کے لئے 10 روپئے کے حساب سے رقم ادا کی جارہی ہے۔ اس لئے عوام اس کے ل ئے کوئی رقم ادا نہ کریں۔