کمٹہ 12/ اپریل (ایس او نیوز) شہر کے وئیبھو ہوٹل کے قریب واقع 'سہارا انڈین کریڈٹ کوآپریٹیو سوسائٹی' کو راتوں رات کاروار شاخ میں ضم کرنے کے لئے شہر سے منتقل کرنے کی کارروائی پر کھاتے داروں نے اعتراض جتایا اور سوسائٹی دفتر کے روبرو ہنگامہ کھڑا کردیا۔
معلوم ہوا ہے کہ اتر پردیش کے لکھنو سے تعلق رکھنے والی سہارا کریڈٹ کوآپریٹیو سوسائٹی کی کمٹہ شاخ کو کاروار شاخ میں ضم کرتے ہوئے اتوار کی رات کو چپکے چپکے کمٹہ شاخ سے ساز وسامان ہٹانے کی کارروائی شروع کی تھی۔ اس بات کی بھنک لگتے ہی بڑی تعداد میں کھاتے دار سوسائٹی دفتر کے روبرو جمع ہوگئے اور سوسائٹی کے منیجر اور اسٹاف کو آڑے ہاتھوں لیتے ہوئے اپنے کھاتوں میں جمع رقم واپس لوٹانے کی مانگ کی۔
ہنگامہ کی خبر ملنے پر کمٹہ پولیس اسٹیشن کے افسران موقع پر پہنچ گئے اور سوسائٹی کے منیجر اور عملہ سے پوچھ تاچھ کی اور تنبیہ کرتے ہوئے کہا کہ سوسائٹی کے تمام کھاتے داروں کے میٹنگ منعقد کرکے اگلی کارروائی کی جائے، اور کھاتے داروں کی ڈپازٹ رقم لوٹائے بغیر سوسائٹی دفتر کو کمٹہ سے منتقل کرنے کی کوشش نہ کی جائے۔
اس معاملے پر اخباری نمائندوں سے بات کرتے ہوئے سوسائٹی کے منیجر ہریش نے بتایا کہ مرکزی دفتر کی طرف سے کمٹہ برانچ کو کاروار برانچ میں ضم کرنے کی ہدایت دی گئی ہے اس لئے یہاں سے دفتر منتقل کیا جارہا ہے۔ انہوں نے گاہکوں کی رقم واپس لوٹانے کا یقین دلاتے ہوئے کہا کہ ہمارا ارادہ گاہکوں کے ساتھ دھوکہ دہی کا نہیں ہے۔