کلبرگی 28/ جنوری (ایس او نیوز) کرناٹکا اسٹیٹ پولیوشن کنٹرول بورڈ نے چنچولی تعلقہ کلبرگی میں قائم بی جے پی رکن اسمبلی بسن گوڈا پاٹل یتنال کے شکر کارخانے کو قوانین کی خلاف ورزی کرنے کی پاداش میں بند کرنے کا حکم جاری کیا ہے ۔
موصولہ تفصیلات کے مطابق شکر کارخانے کا گندہ اور آلودہ پانی ملامری ڈیم میں چھوڑنے کی شکایت کسانوں کی طرف سے موصول ہونے پر پولیوشن کنٹرول بورڈ نے یہ اقدام کیا ہے ۔
رکن اسمبلی یتنال نے اس پر ردعمل ظاہر کرتے ہوئے کہا کہ میں حکومت کے اس قسم کے دباو کے آگے جھکنے والا نہیں ہوں ۔ اس کے خلاف قانونی چارہ جوئی کی جائے گی ۔ حکومت سیاسی طور پر میرا مقابلہ نہیں کر سکتی اس لئے اس طرح کےہتھکنڈے استعمال کیے جا رہے ہیں ۔ میں نے روزگار فراہم کرنے کے مقصد سے ایک پسماندہ علاقے میں کارخانہ قائم کیا ہے ۔ اسے بند کرنے سے کسی کا بھی فائدہ ہونے والا نہیں ہے ۔
جبکہ وزیر برائے فاریسٹ اینڈ ایکولوجی ایشور کھنڈرے کا کہنا ہے کہ متعلقہ حکام سے ضروری اجازت نامہ حاصل کیے بغیر ہی اس کارخانے میں لاکھوں ٹن گنا کچل کر رس نکالا گیا ہے ۔ مرکزی حکومت نے ماحولیاتی ایکٹ کی خلاف ورزی کرنے پر ایک سال قبل اس کارخانے کے خلاف 1.5 کروڑ روپے کا جرمانہ عائد کیا تھا جسے یتنال نے ادا بھی کیا ہے ۔ جب صورتحال ایسی ہے تو پھر یتنال کی طرف سے ریاستی حکومت پر لگائے گئے الزامات بے بنیاد ٹھہرتے ہیں ۔
معلوم ہوا ہے کہ ایک ہفتہ قبل منعقدہ پولیوشن کنٹرول بورڈ کی ایک میٹنگ میں وزیر کھنڈرے نے محکمہ جاتی افسران کو ماحولیاتی ایکٹ کی خلاف وزری کرنے والے کارخانوں کے تعلق سے رپورٹ پیش کرنے کی ہدایت دی تھی ۔ کھنڈرے نے بتایا کہ اسی رپورٹ کی بنیاد پر فضا اور پانی کو آلودہ کرنے والے کارخانوں کے خلاف کا رروائی شروع کی گئی ہے ۔