بنگلورو،4؍ مارچ (ایس او نیوز) ریاستی وزیربرائے آبی وسائل رمیش جارکی ہولی نے سیکس سی ڈی میں ان کے نام کا انکشاف ہونے کے بعد اخلاقی ذمہ داری کی بنیاد پر وزارت سے استعفیٰ دے دیا ہے -

کرناٹک کے وزیر اعلیٰ بی ایس ایڈی یورپا کی قیادت والی حکومت میں وزیر جارکی ہولی کی ایک فحش سی ڈی میڈیا میں جاری کی گئی تھی جس میں وزیر رمیش جارکی ہولی کو ایک عورت کے ساتھ رنگ ریلیاں مناتے ہوئے دکھایا گیا ہے - یہ سی ڈی سماجی کارکن دنیش کلہلی نے جاری کیا ہے -

کلہلی کا الزام ہے کہ جارکی ہولی نے مبینہ طورپر اس خاتون کو کرناٹکا پاور ٹرانس میشن کارپوریشن لمیٹڈ(کے پی ٹی سی ایل) میں ملازمت دلانے کے بہانے اس خاتون سے جنسی تعلقات قائم کرلئے تھے جب جارکی ہولی نے اپنا وعدہ پورا نہ کیا تو متاثرہ خاتون نے اس سیکس سی ڈی کو کلہلی کے حوالہ کردیا -کلہلی نے یہ سی ڈی میڈیا کو جاری کردی -

سی بی آئی جانچ کا مطالبہ:رمیش جارکی ہولی کے بھائی اورکرناٹک ملک فیڈریشن کے چیرمین بالا چندرا جارکی ہولی نے وزیراعلیٰ ایڈی یورپا سے اس پورے معاملہ کی جانچ سی آئی ڈی یا سی بی آئی کے ذریعہ کروانے کا مطالبہ کیا ہے - دریں اثناء میڈیا کو یہ سی ڈی جاری کرنے والے شہری حقوق کمیٹی کے صدر دنیش کلہلی نے کہاکہ متاثرہ خاتون کے اہل خانہ کیلئے انصاف کا مطالبہ کررہے ہیں -

اس سلسلہ میں کلہلی نے کل منگل کے دن شہر کے پولیس کمشنر کمل پنت سے ملاقات کی تھی -انہوں نے اس معاملہ کو کبن پارک پولیس تھانہ میں درج کروانے کا مشورہ دیا اس پر کلہلی نے کہا تھاکہ ہم اس پورے معاملہ کی حقیقت کو سب کے سامنے لانا چاہتے ہیں -اس کے بعد انہوں نے سی ڈی میڈیا میں جاری کردی جیسے ہی اس سی ڈی کو میڈیا نے نشر کیاگیا نہ صرف ریاستی بلکہ مرکزی سیاسی حلقے بالخصوص بی جے پی حلقوں میں ہلچل مچ گئی-

دریں اثناء رمیش جارکی ہولی نے وزارتی عہدہ سے استعفیٰ دینے کی پیشکش کرتے ہوئے وزیراعلیٰ ایڈی یورپا کو ایک خط لکھا ہے جس میں انہوں نے کہا ہے کہ سی ڈی جعلی ہے اور مجھ پر لگائے گئے تمام الزامات جھوٹے ہیں - اس پورے معاملہ کی منصفانہ تحقیقات ہونی چاہئے - میں اخلاقی بنیاد پر استعفیٰ دے رہا ہوں -

اس سے قبل انہوں نے اس معاملہ میں ان کا نام لئے جانے کو سیاسی سازش قرار دیا تھا-اس معاملہ کی تحقیقات کے بعد ملزم کے خلاف کارروائی کا مطالبہ کیا ہے -وہیں مرکزی وزیر پرہلادجوشی نے کہاکہ ہم ابھی کسی نتیجہ پر نہیں پہنچ سکتے ہیں - حقیقت جاننے کی ضرورت ہے - یہ سی ڈی سچ ہے تو پھر یہ شرمناک ہے -