کرناٹک کی10سے زیادہ ندیاں خطرے کے نشان سے اوپر بہنے لگیں،16پل زیر آب ، بیلگاوی سمیت3اضلاع میں سیلاب کا خطرہ، ،کئی مکانوں کو نقصان،بجلی کے کھمبے اوردرخت اکھڑ گئے
بینگلورو، 23/جولائی(ایس او نیوز/ایجنسی)مہاراشٹرا گھاٹ علاقوں اور بیلگاوی، کلبرگی اور یادگیر اضلاع میں تیز ہواؤں کے ساتھ مو سلا دھار بارش کا سلسلہ جاری ہے۔ مذکورہ تینوں اضلاع میں سیلاب جیسی صورتحال پیدا ہو چکی ہے۔ کرشنا،بھومی اور اس کی نہروں میں پانی خطرہ سے اوپر بہنے لگا ہے،اس کو مدنظر رکھ کر ان ندیوں اورنہروں سے دور رہنے کی عوام کو ہدایت دی گئی ہے۔
بیلگاوی ضلع کے16پل زیر آب ہو چکے ہیں،احتیاطی طور پر یادگیر ضلع کے تعلیمی اداروں کو چھٹی دے دی گئی ہے۔بیلگاوی ضلع کے خان پور تعلقہ میں ہو رہی موسلادھار بارش کی وجہ سے اس اضلاع کے تعلیمی اداروں کو بھی چھٹی کا اعلان کیا گیا ہے۔کلبرگی ضلع کی ملا ماری ڈیم زیر آب ہو چکا ہے،جس کی وجہ سے ڈیم کے4گیٹ کھول دیئے گئے ہیں جہاں سے2ہزار کیوسک پانی کو بہایا گیا ہے۔تعلقہ کے5دیہاتوں کے پل زیر آب ہو گئے ہیں۔کلبرگی ضلع کے چن چولی تعلقہ میں 22سے زیادہ مکان زمین بوس ہو چکے ہیں۔
چکمنگلورو ، شیموگہ، وجئے پورسمیت ریاست کے12سے زیادہ اضلاع میں تیز ہواؤں کے ساتھ موسلادھار بارش کی رپورٹیں موصول ہو ئی ہیں۔بیلگاوی ضلع کی اکثر ندیاں خطر ہ کے نشان سے اوپر بہنے لگی ہیں،خان پور تعلقہ کی تمام ندیوں میں پانی کی مقداربڑھ چکی ہے،جس کی وجہ سے ان ندیوں کے قریب عوام کو پہنچنے سے روکا گیا ہے۔ کلبرگی،مل گھاٹ،سیڈم،کلبرگی، چیتا پور کی سڑکیں زیر آب ہو چکی ہیں جس کی وجہ سے رابطہ ٹوٹ چکا ہے۔وجئے پور ضلع کے المٹی ڈیم میں پانی کی مقدار96,805کیو سک تک پہنچ چکی ہے، جاریہ سال پہلی مرتبہ5ہزار کیوسک پانی المٹی بجلی پیداوار کرنے والی یونٹ کے لئے بہایا گیا ہے،جہاں 25میگا واٹ بجلی پیداکرنے کا کام شروع ہو چکا ہے۔
اُتر کنڑا میں بھی بھاری بارش ہو رہی ہے،کاروار تعلقہ کے کدرے مکھ ڈیم کا ایک گیٹ کھول دیاگیا ہے جہاں سے5ہزار کیوسک پانی کا بہاؤ کیا گیا ہے۔ وجئے پور ضلع میں گزشتہ چار دنوں سے موسلا دھار بارش ہو رہی ہے، کل تعلقہ کے جامنل دیہات میں عوامی بیت الخلاء کی چھت ز مین بوس ہو چکی ہے،جس کی وجہ سے 3خواتین زخمی ہو چکی ہیں۔شیموگہ،چکمنگلورو اضلاع میں بھی تیز ہواؤں کے ساتھ بھاری بارش ہو رہی ہے، تنگا،بھدرا اور ہیماوتی ندیاں خطرہ کے نشان سے اوپر بہنے لگی ہیں۔کورگ کے سنٹے کپا میں تیز ہواؤں کے ساتھ ہو ئی بارش کی وجہ سے کئی درخت گر چکے ہیں۔
دکشن کنڑا ضلع کےبیلتنگڈی تعلقہ کمٹے دیہات میں دو سو سالہ قدیم درخت زمین بوس ہو گیا ہے،اس کے علاوہ دو بجلی کھمبے گر گئے ہیں۔ اڈپی میں بھی موسلادھار بارش کی وجہ سے کئی مکانوں کو نقصان پہنچنے کے ساتھ ساتھ کئی درخت گر چکے ہیں۔