مدارس میں کنڑا، انگلش کی تعلیم لازمی؛کرناٹک کے وزیر ضمیر احمد خان کی ہدایت
بنگلورو، 30/اگست (ایس او نیوز/ایجنسی)ہاؤسنگ اور اقلیتی بہبود کے وزیر ضمیر احمد خان نے مدارس میں سائنس اور ریاضی کے مضامین بشمول کنڑ ااور انگریزی پڑھانے کی ہدایت دی ہے۔
ڈائریکٹوریٹ آف اقلیتی بہبودی کے ہال میں محکمہ اقلیتی بہبود کی ترقی کا جائزہ اجلاس سے خطاب کرتے ہوئے انہوں نے کہاکہ مدارس میں کنڑ کو لازمی طور پر پڑھایا جانا چاہیے۔ اس کے علاوہ انہوں نے عہدیداروں کو ہدایت دی کہ وہ انگریزی کے ساتھ دیگر زبانیں پڑھانے کے لیے بھی کارروائی کریں۔ریاست میں وقف بورڈ کے پاس 1 265 مدارس رجسٹرڈ ہیں اور 100 مدارس کے پانچ ہزار بچے اس سال سے عملی طور پر کنڑا، انگریزی، سائنس اور ریاضی سیکھنا شروع کر دیں گے۔
انہوں نے یہ بھی تجویز پیش کی کہ آئندہ سال سے تمام مدارس میں شروع کرنے کی تجویز تیار کی جائے۔اس کے ساتھ ہی وزیر نے ڈائریکٹوریٹ آف اقلیتی بہبود کے تحت مورارجی دیسائی ریزیڈنشیل اسکول اینڈ کالج اور مولانا آزاد ماڈل اسکولوں کے کلاس 9، 10 اور 12 کے طلباء کے تعلیمی معیار کو بہتر بنانے کے لیے تیار کردہ سائنس اور ریاضی سمیت مختلف مضامین پر ایک ہینڈ بک جاری کی۔ اگر طلباء کو مزید معلومات کی ضرورت ہے، تو وہ معلومات حاصل کرنے کے لیے QR کوڈ بھی اسکین کر سکتے ہیں۔