داونگیرے میں منعقدہ جرنلسٹ اسوسی ایشن کے سالانہ پروگرام میں کرناٹک کے وزیر اعلیٰ سدرامیا نے کہا : صحافیوں میں سچ بولنے کی جرات ہونی چاہیے
داونگیرے 4 / فروری (ایس او نیوز) کرناٹکا کے وزیر اعلیٰ سدا رامیا نے داونگیرے میں صحافیوں کی 38 ویں ریاستی کانفرنس کا افتتاح کرتے ہوئے صحافیوں سے کہا کہ وہ توہمات کو مسترد کرتے ہوئے عوام کو سچائی بتانے کی ہمت پیدا کریں ۔ انہوں نے کہا کہ " صحافیوں کو سیاست کی ضرورت نہیں ہے ۔ ان کے پیش نظر مقاصد اور اہداف ہونے چاہئیں ۔ صحافیوں کو غریب اور متوسط طبقے کی معاشی قوت بڑھانے کے لئے جاری کی گئی گارنٹی اسکیموں کو مفت اسکیموں کا نام نہیں دینا چاہیے ۔ کوئی بات لکھنے سے پہلے ان غیر متعصبانہ، سیکیولر اور غیر مذہبی اسکیموں کا جائزہ لینا چاہیے ۔"
وزیر اعلیٰ نے مزید کہا :" دن بھر شوہر بیوی کا جھگڑا دکھانے کے بجائے معاشرے کی ترقی میں رکاوٹ بننے والے مفاد پرستوں کی شناخت کرکے ان کے بارے میں لکھنا چاہیے ۔ اس سے سماجی مقاصد پورے کرنے والی صحافت ممکن ہو سکے گی ۔" انہوں نے کہا کہ وہ پریس کی آزادی کی حامی ہیں مگر اس آزادی کو باوقار رکھنا چاہیے ۔ عام آدمی کو میڈیا سے بڑی توقعات ہوتی ہیں ، اس لئے اسے سماج کے محروم طبقے کے ساتھ کھڑا رہنا چاہیے ۔ ٹیکنالوجی اور سائنس نے بڑی ترقی کی ہے اور جرنلزم کو اس کا پورا فائدہ اٹھانا چاہیے ۔ لیکن صحافیوں کو کسی قیمت پر ایمانداری کا دامن نہیں چھوڑنا چاہیے ۔ صحافیوں کے مسائل حل کرنے کے تعلق سے بات کرتے ہوئے وزیراعلیٰ نے مضافاتی علاقوں کے صحافیوں کے لئے فری بس پاس کی سہولت فراہم کرنے کے تعلق سے سنجیدگی سے غور کرنے اوراگلے بجٹ کے موقع پر مناسب فیصلہ لینے کا یقین دلایا۔
ریاستی کانفرنس کے موقع پر کنڑا روزنامہ اُودیوانی سمیت دیگر کنڑا روزنامہ کے لئے خدمات انجام دینے والے بھٹکل کے سنئیر صحافی رادھا کرشنا بھٹ کو کرناٹک اسٹیٹ ورکنگ جرنلسٹ اسوسی ایشن کی جانب سے خصوصی ریاستی ایوارڈ سے نواز ا گیا۔
ورکنگ جرنلسٹ ایسوسی ایشن کے صدر شیوانندا تگاڈورو نے میڈیا ایڈوائزر برائے وزیر اعلیٰ کے وی پربھاکر کے اشتراک سے منعقدہ اس کانفرنس کی صدارت کی ۔بھٹکل اور اُترکنڑا کے ورکنگ جرنلسٹ اسوسی ایشن سے جُڑے کئی صحافی بھی اس کانفرنس میں شریک تھے۔